21/7/07

മുപ്പതുവര്‍ഷങ്ങള്‍




മുപ്പതുവര്‍ഷങ്ങള്‍;
ഒരുനദിയുടെ പേരാണോ?
എത്രപിന്നോട്ടു തുഴഞ്ഞിട്ടും
പ്രഭവസ്ഥാനം കണ്ടെത്താന്‍ കഴിയാത്ത,
ഇത്രകാലം ഒഴുകിയിട്ടും
കടലിലേക്കഴിഞ്ഞുപോകാത്ത,
ഇല്ലെങ്കിലും ഉണ്ടെന്നു തോന്നുന്ന,
ഉണ്ടെങ്കിലും ഇല്ലാത്തതായ
ഒരു സ്വപ്നസ്ഖലനത്തിന്റെ.....!

മുപ്പതു വര്‍ഷങ്ങള്‍;
ഒരു തോണിയുടെ പേരാണോ?
ഏതു നിലക്കാത്ത ആഴത്തിലും
പൊള്ളയായ ഉള്ളുള്ളതുകൊണ്ട്
പൊങ്ങിത്തന്നെ കിടക്കുന്ന,
ഏതു തിരയിലും മലര്‍ന്നുമാത്രം
കിടക്കാന്‍ വിധിയുള്ള,
കമിഴ്ന്നുചേര്‍ന്ന് നെഞ്ച്പൊട്ടി-
ക്കരയാന്‍ അതിയായ് കൊതിയുള്ള
ഒരു പൊങ്ങച്ചത്തിന്റെ.......!

മുപ്പതുവര്‍ഷങ്ങള്‍;
ഒരു വൃക്ഷത്തിന്റെ പേരാണോ?
എത്ര ശിഖരങ്ങളാണ്,
എത്ര ഇലകളാണ്,
എത്ര മൊട്ടുകളാണ്
തനിക്കുള്ളതെന്നറിയാത്ത,
ഒഴിഞ്ഞുപോകുന്ന മണല്‍ത്തരികളെ
വിലാപം പോലുള്ളവേരുകള്‍ കൊണ്ട്
അള്ളിപ്പിടിച്ചു നില്‍ക്കുന്ന
ഒരു തളര്‍വാതത്തിന്റെ......!

മുപ്പതുവര്‍ഷങ്ങള്‍;
എന്തായാലും
ഒരുജീവിതത്തിന്റെ പേരാകുമോ?
ജനിക്കുന്നതുകൊണ്ട് തുടങ്ങുകയും,
മരിക്കാത്തതുകൊണ്ട്തുടരുകയും
ചെയ്യുന്ന ഒരു ചന്തവഴക്കിന്റെ.....!

മുപ്പതുവര്‍ഷങ്ങള്‍.......
ഏതു മജീഷ്യന്റെ തൊപ്പിയിലെ
മുയല്‍ക്കുഞ്ഞുങ്ങളാണ് ദൈവമേ......?

6 അഭിപ്രായങ്ങൾ:

  1. കൊള്ളാം, അപ്പോള്‍ മുപ്പത് തികഞു അല്ലേ? മുപ്പത് വയസിന്റെ വ്യാഖ്യാനങ്ങള്‍ ഉഗ്രനായിട്ടുണ്ട്. നദി, തോണി, വൃക്ഷം, ജീവിതം, മജീഷ്യന്റെ മുയല്‍കുഞ്ഞുങ്ങള്‍, എല്ല ബിംബങ്ങളും നന്നായി ആസ്വദിച്ചു. ഓരോ കൊല്ലം കഴിയുമ്പോഴും പുതിയ പ്രതീകങ്ങള്‍ ആ ഭാവനയില്‍ വിരിയട്ടെ എന്നാശംസിക്കുന്നു.

    മറുപടിഇല്ലാതാക്കൂ
  2. >കമിഴ്ന്നുചേര്‍ന്ന് നെഞ്ച്പൊട്ടിക്കരയാന്‍
    >അതിയായ് കൊതിയുള്ള
    >ഒരു പൊങ്ങച്ചത്തിന്റെ.......!

    കവിതകളോട് ഗദ്യത്തിനോടുള്ളത്ര പ്രതിപത്തിയില്ലാത്ത ഒരാളാണ് ഞാന്‍. പക്ഷേ താങ്കളുടെ കവിതകള്‍ വളരെ ഇഷ്ടപ്പെട്ടു.

    മറുപടിഇല്ലാതാക്കൂ
  3. മുപ്പതേ ആയുള്ളോ?മുപ്പത്തഞ്ചിന്റെ മടുപ്പുണ്ടിവിടെ.
    നല്ല ഒരു ആശയമായിരുന്നു.ഒരല്പം വാചാലമായി.
    പറ്റുമെങ്കില്‍ ഒന്ന് മാറ്റിയെഴുതിയാല്‍ നന്നാവും.

    മറുപടിഇല്ലാതാക്കൂ
  4. മുപ്പത് വര്‍ഷങ്ങള്‍;
    ഒരു മനുഷ്യന്റെ വയസ്സാണ് സനാതനാ :)

    മറുപടിഇല്ലാതാക്കൂ
  5. മുപ്പതുവര്‍ഷങ്ങള്‍.......
    ഏതു മജീഷ്യന്റെ തൊപ്പിയിലെ മുയല്‍ക്കുഞ്ഞുങ്ങളാണ് ?

    :)

    മറുപടിഇല്ലാതാക്കൂ
  6. മുപ്പതു വര്ഷത്തെ വളരെ നന്നായി അവതരിപ്പിച്ചിരിക്കുന്നു..... എന്ത് തന്നെ പറഞ്ഞാലും ഈ കവിതയ്ക്ക് ഒപ്പം നില്‍ക്കില്ല....


    കമിഴ്ന്നുചേര്‍ന്ന് നെഞ്ച്പൊട്ടിക്കരയാന്‍
    അതിയായ് കൊതിയുള്ള
    ഒരു പൊങ്ങച്ചത്തിന്റെ.......!


    മുപ്പതുവര്‍ഷങ്ങള്‍.......
    ഏതു മജീഷ്യന്റെ തൊപ്പിയിലെ മുയല്‍ക്കുഞ്ഞുങ്ങളാണ് ?
    :)

    മറുപടിഇല്ലാതാക്കൂ