29/7/07

തൂവലുകള്‍

അച്ചനെന്നോട്
പറഞ്ഞാല്‍തീരാത്ത സ്നേഹമാണ്
കള്ളുകുടിക്കാതെ
പെണ്ണുപിടിക്കാതെ
ചൂതുകളിക്കാതെ
അച്ചന്‍ നേടിയ കൊച്ചു സമ്പാദ്യം
മുഴുവന്‍ അനുജത്തിക്കു കോടുത്തപ്പോള്‍
എനിക്കോ...
ആ സ്നേഹമയന്‍
ഒരാകാശം തന്നെ തീറെഴുതിത്തന്നു.

അമ്മയും അങ്ങനെ തന്നെ......
കുഞ്ഞുന്നാള്‍മുതല്‍
അമ്പിളിയമ്മാവനേയും
പൊന്‍‌താരകങ്ങളേയും
മിന്നാമ്മിനുങ്ങുകളേയും
മാത്രമേ എനിക്കു തന്നുള്ളു അമ്മ.

പ്രണയത്തിന്റെ കലഹരാത്രികളില്‍
കാമുകിയോടൊത്തുഞാന്‍
പട്ടിണിതിന്നുറങ്ങുമ്പോള്‍
മിച്ചമുള്ള ചോറും മീന്‍‌തലയും
പട്ടിക്കു കൊടുത്തിരിക്കണം അമ്മ....

വീട്.....
എനിക്കിപ്പോള്‍
ആകാശം തന്നെയാണ്.
ചിറകൊതുക്കാന്‍ ഒരു ചില്ലപോലും
നിര്‍ത്താതെ വെട്ടിവെളുപ്പിച്ച ആകാശം....

പൊഴിഞ്ഞുപോയ തൂവലുകളേ
നിങ്ങളെന്തിനെന്നെ തേടിവരുന്നു.

3 അഭിപ്രായങ്ങൾ:

  1. അച്ഛനു സ്നേഹം. കാരണം അനിയത്തിയെ നോക്കൂ എന്ന് ഏല്‍പ്പിച്ചില്ല. അവളുടെ കാര്യം നല്ലവഴിക്കാക്കി.

    അമ്മയ്ക്കും സ്നേഹം. ഇതൊക്കെത്തന്നെയാണ് എല്ലാ അമ്മമാര്‍ക്കും തരാന്‍ ഉണ്ടാവുക.

    വീട് ആകാശം പോലെയാവട്ടെ. എല്ലാവര്‍ക്കും കാണാന്‍ സ്വാതന്ത്ര്യം ഉണ്ടല്ലോ.

    മനസ്സിലായിടത്തോളം വരികളൊക്കെ ഇഷ്ടമായി.

    qw_er_ty

    മറുപടിഇല്ലാതാക്കൂ
  2. ആത്മാംശം നിറഞ്ഞ കവിത വായിച്ചു. ഇത്രക്കൊന്നുമില്ലെങ്കിലും ചില സമാന അനുഭവങ്ങള്‍ എനിക്കുമുണ്ടായിട്ടുണ്ട്. വേദനിപ്പിക്കുന്ന അനുഭവങ്ങളാണെങ്കിലും ചില കാര്യങ്ങള്‍ ആശ്വാസത്തിന് വക നല്‍കുന്നുണ്ട്.

    കള്ളുകുടിക്കാതെ, പെണ്ണുപിടിക്കാതെ, ചൂതുകളിക്കാതെയാണല്ലോ അച്ചന്‍ കൊച്ചു സമ്പാദ്യം നേടിയത്. എല്ലാ നെറികേടുകളും കാണിച്ച് വലിയ സമ്പാദ്യം നേടിയ അച്ഛന്മാരും ഇതൊക്കെ ചെയ്യാറില്ലേ?

    അമ്പിളിയമ്മാവനേയും പൊന്‍‌താരകങ്ങളേയും
    മിന്നാമിനുങ്ങുകളേയും മക്കള്‍ക്ക് കൊടുക്കാന്‍ സമയവും മനസുമുള്ള അമ്മമാര്‍ ഇന്നുണ്ടോ?

    പ്രണയത്തിന്റെ കലഹരാത്രികളില്‍ കാമുകിയോടൊത്തു പട്ടിണിതിന്നുറങ്ങുമ്പോള്‍ മിച്ചമുള്ള ചോറും മീന്‍‌തലയും അമ്മ പട്ടിക്കു കൊടുത്തിണ്ടാവും, പക്ഷേ അവരുടെ മനസ് വിങ്ങീട്ടുണ്ടാവും.

    പൊഴിഞ്ഞ് പോയെങ്കിലും തൂവലുകള്‍ക്ക് പറിഞ്ഞ് പോന്ന തൊലീയുടെ എണ്ണമയം നഷ്ടമാകാന്‍ ഒരുപാട് സമയമെടുക്കില്ലേ?

    മറുപടിഇല്ലാതാക്കൂ
  3. ഇത് വായഇച്ചപ്പോഴാണ് താങ്കളുടെ പ്രൊഫൈലിന്റെ അവസാനം
    എന്ന് ദു:ഖാര്‍ത്തരായ കുടും‌ബാം‌ഗങ്ങള്‍
    എന്നെഴുതിയതിനെ ‘ഉദ്ദേശ്യം‘ പിടി കിട്ടിയത്.

    മറുപടിഇല്ലാതാക്കൂ