5/8/07

മണ്ണാപ്പേടി

വാക്കുകള്‍ക്ക് ഈ നാട്ടില്‍
എന്തു സ്വാതന്ത്ര്യമുണ്ട്?
നട്ടുച്ചക്കു നടുറോഡിലൂടെ
പോലും അര്‍ത്ഥങ്ങളെ പേടിക്കാതെ
ഇറങ്ങിനടക്കാന്‍ കഴിയുമോ അവയ്ക്ക്...!

നോവലും നോവലും തമ്മില്‍
എന്തു വ്യത്യാസമുണ്ട്‌!
ജാതിയും മതവും ഭാഷയും
ദേശവും വേറെയല്ലേ....
എങ്കിലും കാമഭ്രാന്തന്‍മാരായ
അര്‍ത്ഥങ്ങള്‍ വരികളുടെ എല്ലാ
മുക്കിലും മൂലയിലും വച്ച് വാക്കുകളെ.......

പറഞ്ഞിട്ടെന്തുകാര്യം?
നോവലെന്തെന്നറിയണമെങ്കില്‍
നൊന്തിട്ടുണ്ടായിരിക്കണ്ടേ...

കാക്കയും കാക്കയും തമ്മില്‍
എന്തു വ്യത്യാസമുണ്ട്!
കക്കയും കപ്പളങ്ങയും പോലെയല്ലേ
എങ്കിലും ചില കവികള്‍
കാക്കയെന്നുകേട്ടാലുടന്‍
അയ്യപ്പന്റമ്മ നെയ്യപ്പം ചുട്ടെന്നു
മാത്രമേ പാടുകയുള്ളു.
ചിലരോ വാങ്കുവിളിയുടെ
നാദ തീവ്രതയില്‍ നിസ്കരിക്കുക
മാത്രമേയുള്ളു...

പറഞ്ഞിട്ടൊരു കാര്യവുമില്ല
സുന്ദരികളും യുവതികളുമായ വാക്കുകളേ
പിഴച്ച അര്‍ത്ഥങ്ങളുടെ വെപ്പാട്ടികളാവാന്‍
ഭയമില്ലെങ്കില്‍ മാത്രം വഴിനടപ്പിന്‍.

കിഴവികളായ വാക്കുകളെല്ലാം
കവികളുടെ അരമനയില്‍
ഭോഗവിരക്തിയില്‍
മരണം കാത്തു കിടക്കുന്നു.

4 അഭിപ്രായങ്ങൾ:

  1. വാക്കുകള്‍ക്ക് ഈ നാട്ടില്‍
    എന്തു സ്വാതന്ത്ര്യമുണ്ട്?
    നട്ടുച്ചക്കു നടുറോഡിലൂടെ
    പോലും അര്‍ത്ഥങ്ങളെ പേടിക്കാതെ
    ഇറങ്ങിനടക്കാന്‍ കഴിയുമോ അവയ്ക്ക്...!

    നോവലും നോവലും തമ്മില്‍
    എന്തു വ്യത്യാസമുണ്ട്‌!
    ജാതിയും മതവും ഭാഷയും
    ദേശവും വേറെയല്ലേ....
    എങ്കിലും കാമഭ്രാന്തന്‍മാരായ
    അര്‍ത്ഥങ്ങള്‍ വരികളുടെ എല്ലാ
    മുക്കിലും മൂലയിലും വച്ച് വാക്കുകളെ.......

    മറുപടിഇല്ലാതാക്കൂ
  2. സനാതനന്‍,
    താങ്കള്‍ സത്യത്തിന്റെ വലിയ അര്‍ഥതലങ്ങളാണ്‌ കുറച്ചു വാക്കുകള്‍ കൊണ്ട്‌ സൃഷ്ടിച്ചിരിക്കുന്നത്‌.
    വാക്കുകള്‍ ബലാത്സംഘം ചെയ്യപ്പെടുന്നത്‌ നമ്മുടെ സമൂഹം ലൈംഗീകതയെ ജീവിതത്തിന്റെ പരിശുദ്ധിയുടെ സ്ഥാനം നല്‍കി ആദരിക്കാത്തതിനാലാണ്‌. ലൈഗീകത ആധരിക്കപ്പെട്ടാല്‍ ,.... ബഹുമാനിക്കപ്പെട്ടാല്‍ വാചകത്തിന്റെ മുക്കിലും മൂലയിലും വാക്കുകള്‍ക്ക്‌ ബലാത്സംഘത്തിനു വിടേയരാകേണ്ടിവരില്ല. നമ്മുടെ ഭാഷയിലെ വാക്കുകളെല്ലാം അന്തസ്സുള്ളവയാകും. നമ്മളും...!!!

    മറുപടിഇല്ലാതാക്കൂ
  3. ശരിയാണ്, വാക്കുകള്‍ അര്‍ത്ഥങ്ങളെ പേടിക്കേണ്ടിയിരിക്കുന്നു. സുന്ദരികളും യുവതികളുമായ വാക്കുകള്‍ക്ക് പിഴച്ച അര്‍ത്ഥങ്ങളുണ്ടാകാതിരിക്കട്ടെ.
    എങ്കിലും കിഴവികളായ വാക്കുകളെ കൊല്ലേണ്ടതുണ്ടോ?

    മറുപടിഇല്ലാതാക്കൂ
  4. "മണ്ണാപ്പേടി" എന്ന തലക്കെട്ട് കണ്ടപ്പോള്‍ മറ്റെന്തൊ ആണ് മനസില്‍ കണ്ടത്.
    വേറിട്ട ചിന്ത മനോഹരം.

    മറുപടിഇല്ലാതാക്കൂ