8/9/07

ചെരുപ്പുകുത്തി

ഓര്‍മ്മവച്ച നാള്‍മുതല്‍ പോകുന്നു
ഒരു ചെരുപ്പുകുത്തിയെ തേടി....
അച്‌ഛന്റെ തോളിലിരുന്നുമലകയറിയും
അമ്മയുടെ ഒക്കത്തിരുന്നു പുഴകടന്നും
അമ്മൂമ്മയുടെ വിരലിലാടി വയല്‍ തുഴഞ്ഞും...

തനിക്കു താന്‍ പോരുമെന്നായപ്പോഴും
തുടര്‍ന്നു യാത്രകള്‍
കൊല്ലൂരു മുതല്‍
കന്യാകുമാരിവരെ
പേരുകേട്ടതും
കേട്ടിട്ടില്ലത്തതുമായി
കാക്കത്തൊള്ളായിരം...

ചെരുപ്പുതയ്പ്പിക്കണം
തേഞ്ഞുപോകാത്തൊരാത്മാവു വേണം
അഴിഞ്ഞുപോകാത്ത അലുക്കുകള്‍ വേണം

ഇട്ടുപോകുന്ന ചെരുപ്പുകള്‍
വിലപ്പെട്ടതായാലും അഴിച്ചുവേണം
അകത്തു പോകാന്‍
നഗ്നപാദനായി
നമ്രശീര്‍ഷനായി

തേഞ്ഞുപോയ ചെരുപ്പുകള്‍
തിരികേ വരും വരെ കാത്തുകിടക്കും
മരച്ചുവട്ടിലോ മതിലിന്‍ മറവിലോ....
വിലപ്പെട്ടതാണെങ്കില്‍
പാകമായ കാലുകള്‍ കണ്ടാല്‍
ഒളിച്ചുപോയെന്നിരിക്കും.

ഇപ്പോഴും എനിക്കുള്ളതാ പഴയ ചെരുപ്പു തന്നെ...
ദിനം‌പ്രതി തേയുന്ന ആത്മാവുള്ളത്..
ഇതുവരെ തയ്ച്ചു കിട്ടിയിട്ടില്ല മറ്റൊന്ന്.
ഇന്നുമിതാ നടക്കാനാവാത്ത വിധം
തയ്യലിളകിപ്പോയിരിക്കുന്നു....

വെളുത്ത വസ്ത്രങ്ങളുടെ അറബിനാട്ടില്‍
എവിടെ എനിക്കൊരു ചെരുപ്പുകുത്തി..

അത്ഭുതം....
ഇവിടെയുമുണ്ടവന്‍
ഇരുട്ടു തേക്കലിട്ട വെളിച്ചം
ദീപാരാധന നടത്തുന്ന,
മൂത്ര ഗന്ധം ശീവേലി നടത്തുന്ന
കാലം കട്ടകെട്ടിയ പുരാതന ക്ഷേത്രത്തില്‍
പൊളിഞ്ഞതും പോടിഞ്ഞതുമായ ചെരുപ്പുകള്‍
മുന്നില്‍ നിരത്തി അവനിരിക്കുന്നു.
കറുത്ത ഉടുപ്പിട്ട്
കണ്ണുകള്‍ മാത്രം വേളുത്തുള്ള
ചെരുപ്പുകുത്തി.

അഴിഞ്ഞുപോയ ചെരുപ്പു നീട്ടി
ഞാന്‍ ചോദിച്ചു
തയ്ച്ചു തരാമോ
അഴിഞ്ഞു പോകാതെ
തേഞ്ഞു പോകാത്തൊരാത്മാവു വെയ്ച്ച്..?

കറുത്ത് പൊടിഞ്ഞ കുറ്റിപ്പല്ലുകള്‍ കൊണ്ട്
കഷ്ടപ്പെട്ടു ചിരിച്ച് സഹതാപത്തിന്റെ അറബി ചവച്ച്
അവനെന്തോ പറഞ്ഞു.
മനസ്സിലായില്ല....

ഇപ്പോള്‍ രാത്രിയില്‍...
ഉറക്കം അപൂര്‍വ്വമായ കിടക്കയില്‍
അവന്റെ നിസ്സഹായമായ ചിരിയുടെ അമ്ലലായിനിയില്‍
അര്‍ത്ഥത്തിന്റെ ലവണങ്ങളലിയുന്നു..

8 അഭിപ്രായങ്ങൾ:

  1. ഓര്‍മ്മവച്ച നാള്‍മുതല്‍ പോകുന്നു
    ഒരു ചെരുപ്പുകുത്തിയെ തേടി....
    അച്‌ഛന്റെ തോളിലിരുന്നുമലകയറിയും
    അമ്മയുടെ ഒക്കത്തിരുന്നു പുഴകടന്നും
    അമ്മൂമ്മയുടെ വിരലിലാടി വയല്‍ തുഴഞ്ഞും...

    മറുപടിഇല്ലാതാക്കൂ
  2. ഒരു മെയിലയച്ചിരുന്നു, കിട്ട്യ്യോ ആവോ!
    -സു-

    മറുപടിഇല്ലാതാക്കൂ
  3. സനാതനന്‍ സാറേ,
    ചെരുപ്പുകുത്തിയെക്കുറിച്ചുള്‍ല കവിത മനസ്സിനെ വിഷാദാത്മകമാക്കി
    :)
    ഉപാസന

    മറുപടിഇല്ലാതാക്കൂ
  4. സനാതനന്‍

    ചെരുപ്പ്‌കുത്തി ഹ്രദ്യമായ്‌....അഭിനന്ദനങ്ങള്‍

    വഴിയോരങ്ങളില്‍ നടന്ന് നീങ്ങും
    മാനവരുടെ കാലും നോകിയിരിക്കുമവന്‍
    പൊതികെട്ടുമായ് നടന്നടുകുന്നവരെ കണ്ടാല്‍
    കുളിരുന്നു നിന്‍ മനം
    ഉച്ചയൂണിന്‌ ഇത്തിരി മീന്‍ വാങ്ങാന്‍
    ഒത്തൊരു കോള്‌ ഇന്നെനിക്ക്...


    മന്‍സൂര്‍,നിലംബൂര്‍

    മറുപടിഇല്ലാതാക്കൂ
  5. സനാതനന്‍ മാഷേ,
    ചെരുപ്പുകുത്തി ഹൃദ്യമായി. എന്തോ എണ്റ്റെ തെറ്റി വായന ആണോ എന്നറിയില്ല, ഭഗവത്ഗീതയിലേക്ക്‌ വേരുകള്‍ നീണ്ടു പോകുന്നോ എന്നൊരു സംശയം... പറിഞ്ഞു പോകുന്ന ആത്മാക്കളെ തിരിച്ചു പിടിക്കാന്‍ ശ്രമിക്കുന്ന ചെരുപ്പുകളും, നടപ്പും, പ്രവാസവും, ഉടുപ്പുകള്‍ കുടഞ്ഞു കളയുന്ന ആത്മാക്കളും...

    മറുപടിഇല്ലാതാക്കൂ
  6. ഓരോരുത്തരും ചെരുപ്പുകുത്തിയെ അന്വേഷിക്കുന്നത് അവരവരുടെ ചെരുപ്പ് തേഞ്ഞു തുടങ്ങി എന്ന് തോന്നിത്തുടങ്ങുമ്പോഴാണ്. പുതിയ അലുക്കുകള്‍ പിടിപ്പിച്ച് കുറച്ചുകാലം കൂടി, പിന്നെയും കുറച്ചു കാലംകൂടി... മനസാകുന്ന ചെരുപ്പിന് തേച്ചിലുണ്ടാകുന്നത് ഭയം കടന്നു കൂടുമ്പോഴാണ്. നാടേതായിരുന്നാലും പിന്നെ അലച്ചിലാണ് ചെരുപ്പുകുത്തിയെ തേടി. ചെരുപ്പു കുത്തി സര്‍വ്വവ്യാപിയാണ്, എല്ലാ നാട്ടിലുമുണ്ടെന്ന് വിശ്വസിക്കും. എങ്കിലും തന്റെ മനസിനിണങ്ങിയ അലുക്കുകള്‍ പിടിപ്പിക്കുന്നതിന് മനസ്സിനിണങ്ങിയ ചെരുപ്പുകുത്തി തന്നെ വേണമെന്ന് ശഠിക്കും. അച്‌ഛന്റെ തോളിലിരുന്നുമലകയറിയും
    അമ്മയുടെ ഒക്കത്തിരുന്നു പുഴകടന്നും താന്‍ കണ്ട ചെരുപ്പുകുത്തി.

    ഓ.ടോ അക്ഷരതെറ്റുകള്‍ തിരുത്തിയാല്‍ നന്നായിരുന്നു. ‘ഇരുട്ടു തേക്കലിട്ട വെളിച്ചം’ മനസിലായില്ല.
    സ്നേഹപൂര്‍വ്വം സജി.

    മറുപടിഇല്ലാതാക്കൂ
  7. സ്നേഹമുള്ള സജി,
    തെറ്റുകള്‍ തിരുത്താന്‍ ശ്രമിക്കാം.
    കായല്‍ വെള്ളം കെട്ടിനില്‍ക്കുന്നതിനെ തേക്കലിടുക എന്നു പറയും.

    മറുപടിഇല്ലാതാക്കൂ