3/11/07

ഒറ്റയ്ക്ക്

ഒറ്റയ്ക്കെന്നാല്‍
ആരും കൂടെയില്ല എന്നല്ല
കൂടെയുള്ളവര്‍ക്കൊപ്പം
ഞാനില്ല എന്നാണ്.

കൂടെയുള്ളവരുടെയൊരു
നിഴല്‍ക്കാടാണ് ചുറ്റിലും.
മരിച്ചുപോയിട്ടും
ജീവിച്ചിരിക്കുന്നവര്‍,
ജീവിച്ചിരിക്കുമ്പൊഴും
മരിച്ചുപോയവര്‍,
ജനിക്കാത്തവര്‍,
ജനിക്കും മുന്‍പു
ഞാന്‍ മരിപ്പിച്ചവര്‍‍,
മരക്കൊമ്പില്‍
കഴുത്തിനെ കണക്റ്റ് ചെയ്ത്
വൈദ്യുതി കണ്ടെത്തിയവര്‍,
നെഞ്ചില്‍
കത്തികൊണ്ട് ചും‌ബിച്ച്
പട്ടുറോസാപ്പൂക്കളുടെ
ഉദ്യാനം നനച്ചവര്‍,
പാളത്തില്‍
കാതു ചേര്‍ത്തു വച്ച്
കുതിച്ചോടുന്ന ജീവിതത്തിന്റെ
ചടുല ഭൂപാളം കേട്ടവര്‍......

ചിലര്‍ക്കെല്ലാം വിരലുകളുണ്ട്
ആരെയും തൊടാനല്ല
അവര്‍ സിഗരറ്റ് വലിക്കുകയോ
താളം പിടിക്കുകയോ ആവും.

എനിക്കുമുണ്ട് വിരലുകള്‍
‍ഞാനും ആരെയും തൊടുന്നില്ല
സിഗരറ്റു വലിക്കുന്നില്ല
താളം പിടിക്കുന്നില്ല
വിരലുകള്‍ കൊണ്ട്
എനിക്കൊന്നും നേടാനില്ല.

ചിലര്‍ക്കെല്ലാം ചുണ്ടുകളുണ്ട്
ആരേയും ചും‌ബിക്കാനല്ല
അവര്‍ മുലകുടിക്കുകയോ
പഴയപാട്ടുകള്‍
ചൂളംകുത്തുകയോ ആവും.

എനിക്കുമുണ്ട് ചുണ്ടുകള്‍
‍ഞാനുമാരേയും ചും‌ബിക്കുന്നില്ല
പഴയ പാട്ടുകള്‍
ചൂളംകുത്താറില്ല
മുലകുടിക്കുന്നില്ല
ചുണ്ടുകള്‍ കൊണ്ട്
എനിക്കൊന്നും നേടാനില്ല.

ചിലര്‍ക്കെല്ലാം കാലുകളുണ്ട്
നാട്ടുവെളിച്ചത്തില്‍
വീട്ടിലേക്ക് നടക്കാനല്ല
അവര്‍ നൃത്തം ചെയ്യുകയോ
കാലുകള്‍ക്കു മുകളില്‍
‍ചില്ലകളും ഇലകളും വിടര്‍ത്തി
കാറ്റിനൊപ്പമാടുകയോ ആവും.

എനിക്കുമുണ്ട് കാലുകള്‍
‍ഞാനും നാട്ടുവെളിച്ചത്തില്‍
വീട്ടിലേക്ക് നടക്കുന്നില്ല
നൃത്തം ചെയ്യാറില്ല
കാലുകള്‍ക്കു മുകളില്‍
ചില്ലകളും ഇലകളും വിടര്‍ത്തി
കാറ്റിനൊപ്പമാടാനുമാവുന്നില്ല
കാലുകള്‍ കൊണ്ടും
എനിക്കൊന്നും നേടാനില്ല.

ഒറ്റയ്ക്കെന്നാല്‍
ആരും കൂടെയില്ല എന്നല്ല
കൂടെയുള്ളവര്‍ക്കൊപ്പം
ഞാനില്ല എന്നാണ്.

16 അഭിപ്രായങ്ങൾ:

  1. ഒറ്റയ്ക്കെന്നാല്‍
    ആരും കൂടെയില്ല എന്നല്ല
    കൂടെയുള്ളവര്‍ക്കൊപ്പം
    ഞാനില്ല എന്നാണ്.

    മറുപടിഇല്ലാതാക്കൂ
  2. ഒറ്റയ്ക്കെന്നാല്‍
    ആരും കൂടെയില്ല എന്നല്ല
    കൂടെയുള്ളവര്‍ക്കൊപ്പം
    ഞാനില്ല എന്നാണ്.

    എന്തു പറ്റീ..???
    ഒരു നിരാശാ...:)

    മറുപടിഇല്ലാതാക്കൂ
  3. "ഒറ്റയ്ക്കെന്നാല്‍
    ആരും കൂടെയില്ല എന്നല്ല
    കൂടെയുള്ളവര്‍ക്കൊപ്പം
    ഞാനില്ല എന്നാണ്."

    ശരിയാണ്. പലപ്പോഴും ആള്‍ക്കൂട്ടത്തിലും നമ്മള്‍ ഒറ്റയ്ക്കാവാറുണ്ടല്ലോ !!

    മറുപടിഇല്ലാതാക്കൂ
  4. കവിതയെങ്കിലും ഉണ്ടാകുമല്ലോ കൂടെ:)

    മറുപടിഇല്ലാതാക്കൂ
  5. ഒറ്റയ്ക്കെന്നാല്‍
    ആരും കൂടെയില്ല എന്നല്ല
    കൂടെയുള്ളവര്‍ക്കൊപ്പം
    ഞാനില്ല എന്നാണ്.

    awesome

    മറുപടിഇല്ലാതാക്കൂ
  6. കവിത ഒരേ സമയം സങ്കടപ്പെടുത്തുകയും കുറ്റപ്പെടുത്തുകയും ചെയ്യുന്നു.
    എനിക്ക് വയ്യ,ഞാന്‍ യോജിക്കുകയില്ല.

    മറുപടിഇല്ലാതാക്കൂ
  7. ഒറ്റയ്ക്കെന്നാല്‍
    മലമുകളിലെ
    ചന്ദ്രനെപ്പോലെ
    നിഴലിനു കൂട്ടാവുകയും
    കാറ്റില്‍
    നൃത്തം ചെയ്യുകയുമാണ്.

    ഒറ്റക്കെന്നാല്‍
    മേഘങ്ങളില്‍ നിന്നുകൊണ്ട്
    പൂക്കളെ
    വിരിയിക്കുകയും
    മഞ്ഞിനെ
    തണുപ്പിക്കുകയുമാണ്.

    ഒറ്റക്കെന്നാല്‍
    എല്ലാവരോടുമൊപ്പം
    എല്ലായിടത്തും
    ആയിരിക്കുകയാണ്.

    ഞാന്‍ ഒറ്റക്കാണ്...

    എനിക്കിത്രയൊക്കെയെ പറ്റൂ. എന്റെ ഒരെളിമയേ..

    മറുപടിഇല്ലാതാക്കൂ
  8. ഒറ്റയ്‌ക്കു വന്നവര്‍
    ഒറ്റയ്‌ക്കു പോകുന്നവര്‍
    ഒറ്റയ്‌ക്കു പോകുമ്പോള്‍
    ഞങ്ങളുടെ ഹൃദയം പറിച്ചോണ്ടു പോകല്ലേ
    വെറുതേ വേദനിപ്പിക്കുവാനായ് സ്‌നേഹിക്കരുതേ.

    മറുപടിഇല്ലാതാക്കൂ
  9. നെഞ്ചില്‍
    കത്തികൊണ്ട് ചും‌ബിച്ച്
    പട്ടുറോസാപ്പൂക്കളുടെ
    ഉദ്യാനം നനച്ചവര്‍,
    പാളത്തില്‍
    കാതു ചേര്‍ത്തു വച്ച്
    കുതിച്ചോടുന്ന ജീവിതത്തിന്റെ
    ചടുല ഭൂപാളം കേട്ടവര്‍......

    മാഷേ നന്നായിരിക്കുന്നു. പക്ഷേ ആവര്ത്തനം ഒരേ സമയം തന്നെ കവിതയുടെ ശക്തിയും ദുര്ബ്ബലതയും ആകുന്നത് അറിയാന് പറ്റുന്നുണ്ട്, വല്ലാത്ത വായനാപ്രതിസന്ദ്ധി...
    മരക്കൊമ്പില്‍
    കഴുത്തിനെ കണക്റ്റ് ചെയ്ത്
    വൈദ്യുതി കണ്ടെത്തിയവര്‍
    ഇതിലെ,
    "കഴുത്തിനെ കണക്റ്റ് ചെയ്ത്
    വൈദ്യുതി കണ്ടെത്തിയവര്‍"
    എന്ന വരികളിലെ ഇംഗ്ളീഷ് വാക്ക് മുഴച്ച് നില്ക്കുന്നതു പോലെ തോന്നുകയും ചെയ്തു. തുല്യാര്ത്ഥമുള്ള ഒരു മലയാളം വാക്ക് ആയിരുന്നു ഉചിതമെന്ന് തോന്നുന്നു.

    മറുപടിഇല്ലാതാക്കൂ
  10. ഒറ്റയ്ക്കെന്നാല്‍
    ആരും കൂടെയില്ല എന്നല്ല
    കൂടെയുള്ളവര്‍ക്കൊപ്പം
    ഞാനില്ല എന്നാണ്.


    അതു ശരി!

    അപ്പോള്‍,

    കൂട്ടത്തിലാണു ഞാനെന്നു നീ ചൊല്ലുകില്‍
    ഏകനല്ലെന്നു നീ തെറ്റിദ്ധരിക്കൊലാ.
    ചുറ്റും ജനങ്ങള്‍‍ നിറഞ്ഞുനില്‍ക്കുമ്പൊഴും‍
    ഞാനെന്നുമേകനാണെന്നതാണുത്തരം!

    മറുപടിഇല്ലാതാക്കൂ
  11. രചയിതാവ് ഈ അഭിപ്രായം നീക്കംചെയ്തു.

    മറുപടിഇല്ലാതാക്കൂ
  12. ജീവിതത്തിലെ സുപ്രധാന ഘട്ടങ്ങളിലൊക്കെ
    ഏതു മനുഷ്യനും ഏകനാണ്...
    നല്ല നിരീക്ഷണം.

    മറുപടിഇല്ലാതാക്കൂ
  13. വളരെ സന്തോഷം.മനുവിന്റെ കവിതക്കും സുനീഷിന്റെ വിമര്‍ശത്തിനും വിഷ്ണുപ്രസാദിന്റെ വിയോജിപ്പിനും പ്രമോദിനും പ്രയാസിക്കും ചോപ്പിനും വാല്‍മീകിക്കും വാണിക്കും എല്ലാപേര്‍ക്കും എല്ലാപേര്‍ക്കും എന്റെ സന്തോഷം പതിച്ചുതന്നിരിക്കുന്നു.

    മറുപടിഇല്ലാതാക്കൂ
  14. ഒറ്റയ്ക്കെന്നാല്‍
    ആരും കൂടെയില്ല എന്നല്ല
    കൂടെയുള്ളവര്‍ക്കൊപ്പം
    ഞാനില്ല എന്നാണ്.

    ഒറ്റയ്ക്കെന്നാല്‍
    ഞാന്‍ പോലും എനിക്ക് ശല്യമാവുംപോഴാണ്
    അല്ലേ സനതനാ

    മറുപടിഇല്ലാതാക്കൂ
  15. ഒറ്റയ്ക്കെന്നാല്‍
    ആരും കൂടെയില്ല എന്നല്ല
    കൂടെയുള്ളവര്‍ക്കൊപ്പം
    ഞാനില്ല എന്നാണ്.

    ഒറ്റയ്ക്കെന്നാല്‍
    ഞാന്‍ പോലും എനിക്ക് ശല്യമാവുംപോഴാണ്
    അല്ലേ സനതനാ

    മറുപടിഇല്ലാതാക്കൂ