6/12/07

ഓര്‍മ്മക്കുളിര്‍

കിണറുകള്‍,
മണ്ണുകൊണ്ട് ഉള്ളിലോട്ട്
കൊത്തിയെടുത്ത
കുത്തബ്മീനാറുകള്‍.
തൊടിതൊടിയായി
കണ്ണിനെ പടികയറ്റുന്ന
നിമ്നശില്‍പ്പം.
കുത്തബ്മീനാറിനില്ലാത്ത
ഒരു കുളിരുണ്ടതിനു്.
ഇടിഞ്ഞുപോയ
കൈവരിയില്‍ത്താങ്ങി
താഴോട്ടുനോക്കിയാല്‍
വാത്സല്യത്തിന്റെ
ഓളങ്ങള്‍ ഇളകും.

മുറ്റങ്ങള്‍,
വെയിലിലുണങ്ങാന്‍
വിരിച്ചിട്ട ഛായാചിത്രങ്ങള്‍.
മരങ്ങള്‍, പക്ഷികള്‍,
വീടിന്റെ മേല്‍ക്കൂര,
കുട്ടികള്‍ കോറിയ
വട്ടുകോളങ്ങള്‍,
കാറ്റ്, കരിയില,
പൂമ്പാറ്റച്ചിറക്,
കുഴിയാനക്കെണി
ഒക്കെയുള്ള
ഒരുവമ്പന്‍ കാന്‍‌വാസ്

വയലുകള്‍
ഉത്സവപ്പറമ്പുകള്‍...
കൊയ്ത്തുകഴിഞ്ഞാല്‍
കുട്ടികള്‍ മുളച്ച് പൂക്കുന്ന
പട്ടങ്ങളുടെ വേനല്‍കൃഷി.
അറുത്തുവിട്ട
ഞാറിന്‍ തണ്ടുകൊണ്ട്
നാഗസ്വരക്കച്ചേരി.
പോക്കാച്ചിക്ക്
പലിശക്ക് വെള്ളം
കൊടുക്കുന്ന
ഞണ്ടമ്മാവന്റെ
കച്ചവടം‍.

ഓര്‍മ്മകളില്‍
ആകെ
ഒരു കുളിര്‍കാലമാണ്.
ഓര്‍ത്തോര്‍ത്തിരുന്നാല്‍
വൃശ്ചികത്തില്‍
പുലര്‍ച്ചെയുണര്‍ന്ന്,
“കാക്കുടുക്കയില്‍
കയ്യും ചൊരുവി”
കൂമ്പിക്കിടക്കുന്ന സുഖം..
എണീക്കാനേ തോന്നില്ല.
എണീല്‍ക്കരുത്
ഇനിയീ ഓര്‍മകളും
വെയില്‍ തിന്നു പോകും വരെ.

[അരിക്ക് വിലകൂടുന്നു.വെള്ളത്തിന് വിലകൂടുന്നു.എന്റെ നാട്ടില്‍ നിറയെ വയലുകളുണ്ടായിരുന്നു പത്തിരുപതുവര്‍ഷത്തെ അശ്രാന്തപരിശ്രമം കൊണ്ട് എന്റെ നാട്ടുകാര്‍ അതിനെയൊക്കെ കൊന്ന് തെങ്ങുംതോപ്പുകളില്‍ കുഴിച്ചിട്ടു.കിണറുകളെ കൊന്ന് കുഴല്‍ക്കിണറുകളോ പുഴവെള്ളത്തില്‍ ബ്ലീച്ചിം‌ഗ് പൊടികലക്കിയ കുഴല്‍‌വെള്ളമോ ആക്കി.മരങ്ങളെ വെട്ടിമാറ്റി സിമന്റിട്ടുമിനുക്കി മുറ്റങ്ങളെക്കൊന്നു.ഒരുപക്ഷേ അവര്‍ ഇപ്പോള്‍ കരുതുന്നുണ്ടാവാം ഒരു തിരിച്ചുപോക്ക് അസാധ്യമെന്ന്.അല്ലെന്ന് .. അല്ലായിരുന്നെങ്കിലെന്ന് ഒരു കൊതി...എന്തുചെയ്യാന്‍ കഴിയും? ]

12 അഭിപ്രായങ്ങൾ:

  1. ക്വോട്ടാന്‍ കുറേയുണ്ട്.

    കുത്തബ് മീനാറിന്റെ ഉപമ അതിഗംഭീരം !

    മറുപടിഇല്ലാതാക്കൂ
  2. അറുത്തുവിട്ട
    ഞാറിന്‍ തണ്ടുകൊണ്ട്
    നാഗസ്വരക്കച്ചേരി.


    കൊള്ളാം മാഷേ

    മറുപടിഇല്ലാതാക്കൂ
  3. കവിത വളരെയിഷ്ടപ്പെട്ടു.
    കുട്ടിക്കാലത്തേക്ക് കൈപിടിച്ചു കൂട്ടിക്കൊണ്ടു പോയ വരികള്‍.
    ഓരോ കാഴ്ചകളും അതീവ സുന്ദരം.

    മറുപടിഇല്ലാതാക്കൂ
  4. രചയിതാവ് ഈ അഭിപ്രായം നീക്കംചെയ്തു.

    മറുപടിഇല്ലാതാക്കൂ
  5. നല്ല വരികള്‍,
    ഓര്‍മകളെ വിളിച്ചു കൊണ്ടു വരുന്നു

    മറുപടിഇല്ലാതാക്കൂ
  6. സനാതനന്‍

    ഓര്‍ക്കേണ്ടത്‌ ഓര്‍ക്കാന്‍
    അറിയാന്‍ അറിഞ്ഞിരിക്കാന്‍
    സന്ദേശമായി...ദൂത്‌ പോലെ

    അഭിനന്ദനങ്ങള്‍


    നന്‍മകള്‍ നേരുന്നു

    മറുപടിഇല്ലാതാക്കൂ
  7. “കിണറുകള്‍,
    മണ്ണുകൊണ്ട് ഉള്ളിലോട്ട്
    കൊത്തിയെടുത്ത
    കുത്തബ്മീനാറുകള്‍“

    അതു കലക്കി മാഷെ

    മറുപടിഇല്ലാതാക്കൂ
  8. കുട്ടിക്കാലത്തെ സുഖമുള്ള കുറേ ഓര്‍മ്മകള്‍ തന്നതിന് നന്ദി.
    പോക്കാച്ചിക്ക് പലിശക്ക് വെള്ളം
    കൊടുക്കുന്ന ഞണ്ടമ്മാവന്റെ കച്ചവടം‍.
    ഓരോ മഴക്കാലത്തും പുതുമ നഷ്ടപ്പെടാതെ അമ്മ പറഞ്ഞ് തന്നിരുന്ന കഥ.

    മറുപടിഇല്ലാതാക്കൂ
  9. “ഏകാന്തതയുടെ ദിനാന്ത്യക്കുറിപ്പുകള്‍ ADULTS ONLY“ എന്നത് മനസിലായില്ല.
    profile-ലെ ആ മെഴുക്കുപുരട്ടി പ്രയോഗം ഉഗ്രന്‍.

    മറുപടിഇല്ലാതാക്കൂ
  10. എണീക്കരുത്, എണീക്കാ‍തെ കിടന്നിടത്ത് കിടന്ന് പകര്‍ത്തൂ. ഞങ്ങളും പൊടിതട്ടിയെടുക്കട്ടെ.

    കിണറും മുറ്റവും വയലും വര്‍ണ്ണന നന്നായി.
    ‘കൊയ്ത്തുകഴിഞ്ഞാല്‍
    കുട്ടികള്‍ മുളച്ച് പൂക്കുന്ന
    പട്ടങ്ങളുടെ വേനല്‍കൃഷി.’ പെരുത്ത് ഇഷ്ടായി.
    ‘മുറ്റങ്ങള്‍,
    വെയിലിലുണങ്ങാന്‍
    വിരിച്ചിട്ട ഛായാചിത്രങ്ങള്‍.’ ഇതിന് തുല്യമായതെവിടെയോ വായിച്ച പോലെ(?)

    മലകളൊക്കെ
    കുളങ്ങളില്‍ കുളിച്ച്
    പാടങ്ങളില്‍
    ഉണങ്ങാന്‍ കിടന്നു.
    മരങ്ങളൊക്കെ
    കോണ്‍ക്രീറ്റുകാടി-
    ന്നലങ്കാരമൊരുക്കാന്‍
    കൂട്ടത്തോടെ കാടിറങ്ങി.

    മറുപടിഇല്ലാതാക്കൂ