9/3/08

ചോരയുടെ അവസ്ഥകള്‍

ചോര എന്ന ദ്രവ്യത്തിന്
മൂന്നവസ്ഥകളുണ്ട്
ഖരം
ദ്രാവകം
വാതകം

വാതവകാവസ്ഥയിലെ ചോരക്ക്
രൂപവും രുചിയും മണവും
ഉണ്ടായിരിക്കില്ല.
ചോര
വാതകാവസ്ഥയില്‍
വ്യാപരിക്കുമ്പോഴാണ്
അപരിചിതരായ
ആരുടെയെങ്കിലും
വിരല്‍ മുറിയുന്നത് കണ്ടാലും
ബലൂണ്‍ പോലെ ചിലര്‍
അബോധത്തിലേക്ക്
പറന്നുപോകുന്നത്.

ദ്രാവകാവസ്ഥയിലെ ചോര
എപ്പോഴും തിളച്ചുകൊണ്ടേയിരിക്കും
പ്രതികാരാഗ്നിയിലോ
പ്രതിഷേധാഗ്നിയിലോ
പ്രണയാഗ്നിയിലോ
ആകാം അത്.
രുചിയും മണവുമുണ്ടാകും
പക്ഷേ രൂപമുണ്ടാകില്ല.
തിളച്ച് മറിഞ്ഞ്
കുന്തിപ്പുഴപോലെ
കുത്തിയൊഴുകുന്ന
ചോരയിലാണ്
ചരിത്രത്തില്‍ ചക്രവര്‍ത്തിമാര്‍
അഭിഷിക്തരായിരുന്നതും
മഹാകവികളാകേണ്ടിയിരുന്നവര്‍
മുങ്ങിമരിച്ചതും.

ഖരാവസ്ഥയിലെ ചോരക്കാണ്
ഏറ്റവും സൌന്ദര്യം.
രൂപവും മണവും
രുചിയുമുണ്ടാകും.
ഭാവനാപൂര്‍ണ്ണമായി
അലങ്കരിച്ച
പുഡ്ഡിം‌ഗ് പോലെ
നാവില്‍ വെള്ളമൂറിക്കുന്ന
കാഴ്ചയാണത്.
തലമുറിഞ്ഞുപോയ
കഴുത്തിന് മുകളില്‍ നിന്ന്
നമുക്കതിനെ നക്കിയെടുക്കാന്‍ തോന്നും.

12 അഭിപ്രായങ്ങൾ:

  1. ഖരാവസ്ഥയിലെ ചോരക്കാണ്
    ഏറ്റവും സൌന്ദര്യം.
    രൂപവും മണവും
    രുചിയുമുണ്ടാകും.
    ഭാവനാപൂര്‍ണ്ണമായി
    അലങ്കരിച്ച
    പുഡ്ഡിം‌ഗ് പോലെ
    നാവില്‍ വെള്ളമൂറിക്കുന്ന
    കാഴ്ചയാണത്.
    തലമുറിഞ്ഞുപോയ
    കഴുത്തിന് മുകളില്‍ നിന്ന്
    നമുക്കതിനെ നക്കിയെടുക്കാന്‍ തോന്നും.


    ശക്തം... ചോര കണ്ടാല് ബോധം മറയുന്ന അവസ്ഥകളില് നിന്നും പ്രതികാരത്തിളപ്പുകളില് കൂടി യൌവനങ്ങള് കഴുത്ത് വെട്ടി ചോര നക്കിയെടുക്കുന്ന അവസ്ഥകളില് എത്തുന്ന സമകാലീന യാഥാര്ഥ്യങ്ങളുടെ നേര്ക്കണ്ണാടി.... കവിതയുടെ രാഷ്ട്രീയത്തേക്കാളുപരി അതിന്റെ പിന്നില് പ്രവര്ത്തിച്ച മനുഷ്യപ്പറ്റിന്റെ സന്കടങ്ങളോട് ആദരവ്. കല കാലത്തിന്റെ കണ്ണാടിയാകുന്നത് ഇവിടെ കാണാന് കഴിയുന്നു.
    ഓഫ്:
    അരേ ദുരാചാര കംസാ
    പരാക്രമം ചോരയോടല്ലാ വേണ്ടൂ.
    ഞാന് പിണങ്ങി. കണ്ണൂരില് ചോര വാള്ത്തലകളില് കട്ട പിടിക്കുന്നെന്ന് വച്ച് കവിതപ്പെണ്കൊടിയെ ചോര കൊണ്ട് ഗുരുതി നടത്തി ദുര്ഗ്ഗയും കാളിയുമാക്കണമായിരുന്നോ? സത്യമായും നെന്ചുരുകി.

    മറുപടിഇല്ലാതാക്കൂ
  2. ഒരവസ്ഥ കൂടിയുണ്ട്.. പ്ളാസ്മാവസ്ഥ..

    അതിലാണ്‌ രണ്ടു ചോരത്തുള്ളികള്‍ പരസ്പരം തിരിച്ചറിയുന്നത്‌.. ഒന്നിച്ചൊരു പനിനീര്‍പൂവിനു നിറം നല്‍കുന്നത്..

    എന്തേ അതു വിട്ടു പോകുന്നു?

    മറുപടിഇല്ലാതാക്കൂ
  3. രക്തദാഹി കുടിയ്ക്കുന്നതിനൊപ്പം
    തിന്നുകയും ശ്വസിയ്ക്കുകയും ചെയ്യും

    മറുപടിഇല്ലാതാക്കൂ
  4. വളരെ നന്നായിരിക്കുന്നു.

    മാത്രമല്ല അതൊരു മള്‍ടിയൂസ് ഐറ്റമാണ്.
    അതിന്റെ പശപ്പുകൊണ്ടു വേണം അധികാരക്കസേരയുടെ കുഷ്യന്‍ ഒട്ടിക്കാന്‍.
    അതു വിരല്‍തുമ്പിലെടുത്തു വേണം ഭാരതാംബയ്ക്കു കുറിതുടുവിക്കാന്‍....


    ബാക്കിയാവുന്ന വിളര്‍ത്ത ജഡത്തിലാണ് പൂച്ചക്രങ്ങളും ഉള്ളിക്കണ്ണീരും കൊണ്ടു മൂടുന്നത്.

    മറുപടിഇല്ലാതാക്കൂ
  5. കണ്ണൂരില്‍ ഇപ്പൊ പോയാല്‍ ഈ പറഞ്ഞ എല്ലാ അവസ്ഥയിലും ചോര കാണാം. പിന്നെ പ്ലാസ്മാവസ്ഥ ബോണസ്സും.

    മറുപടിഇല്ലാതാക്കൂ
  6. പ്ളാസ്മാവസ്ഥ..
    വിട്ടു പോയ ആ ഒരു അവസ്തയില്‍ നിന്നാണ്‌ ഈ കവിതയുടെ പിറവി.
    ചോര കൊണ്ടാണ്‌ ഞാനീ വരികള്‍ എഴുതിയത്‌.

    വരാം

    മറുപടിഇല്ലാതാക്കൂ
  7. നിന്റെ ചോരയുടെ നിറമേതാണ്?
    എന്നിട്ടു വേണം ഒരു രക്തസാക്ഷി മണ്ടപം പണിയാന്‍.
    വായിച്ചു വായിച്ചു വായിച്ചു കൊണ്ടേയിരുന്നു

    മറുപടിഇല്ലാതാക്കൂ
  8. സനാതനന്‍ എന്തു മൂര്‍ച്ചയാടാ നിന്റെ വരികള്‍ക്ക്,
    ഇന്നത്തെ പത്രം ഇതെ ഇപ്പൊ വായിച്ചേയുള്ളു ഒപ്പം നിന്റെ കവിത കൂടി ആയപ്പോല്‍

    ഖരാവസ്ഥയിലെ ചോരയെ കുറിച്ച് പറഞ്ഞേടത്തു നിന്ന് വാക്കുകളുടെ ശക്തി ഞാനറിയുന്നു

    മറുപടിഇല്ലാതാക്കൂ
  9. കണ്ണൂര്‍ പോയിരുന്നോ?

    മാഷേ, തീഷ്ണമായ വരികള്‍ എന്നു ഞാന്‍ പറഞ്ഞാല്‍ അത് അതിശയോക്തിയല്ല..

    മറുപടിഇല്ലാതാക്കൂ
  10. കവിതയുടെ വായന വെറും രാഷ്ട്രീയം, പ്രാദേശികം ,ഭൌതികം മാത്രമായ്‌ ചുരുങ്ങി പോയതില്‍ ഖേദമുണ്ട്‌.
    ഇതിനപ്പുറം കവിത വളരുന്നുണ്ട്‌ .ആഴത്തിലേക്കും ആകാശത്തിലെക്കും!

    മറുപടിഇല്ലാതാക്കൂ