13/4/08

തലയണ

ചാണകത്തറയുടേയും
തഴപ്പായയുടേയും കാലത്ത്‌
സാരിവെട്ടിത്തയ്ച്ച ഉറയില്‍
പഴന്തുണി തിരുകിവച്ച്‌
തലയണയുണ്ടാക്കിയിരുന്നു അമ്മ

കക്ഷം കീറിയ ബ്ലൗസുകള്‍
ബട്ടണ്‍ പോയ ഉടുപ്പുകള്‍
അരയ്ക്കു പാകമാകാത്ത പാന്റ്സുകള്‍
ഹുക്കുപോയ അടിവസ്ത്രങ്ങള്‍
നരച്ചുപോയ മഞ്ഞക്കോടികള്‍
കരിപുരണ്ട സാരിത്തുണ്ടുകള്‍
കറപിടിച്ച തൂവാലകള്‍
കുട്ടിയുടുപ്പുകള്‍
വള്ളിനിക്കറുകള്‍

പരുപരുത്ത തലയണയില്‍
ഉറക്കം അസ്വസ്ഥമായിരുന്നു
പൊട്ടിപ്പോയ ബട്ടണിലോ
നൂര്‍ന്ന് ധിക്കാരിയായ
ഹുക്കുകളിലോ
ഓര്‍മ്മയുടെ നൂലുകള്‍
കൊളുത്തിപ്പിടിച്ചിരുന്നു

അസ്വസ്ഥതയില്‍ ഭാരിച്ച
തല താങ്ങി താങ്ങി
പിഞ്ഞിപ്പോയാല്‍
തലയണയില്‍ നിന്നും
കാലം പുറത്തിറങ്ങി നടന്നിരുന്നു

അച്ചന്റെ പാന്റ്സും
അമ്മയുടെ ബ്ലൗസുമൊക്കെ
ദീര്‍ഘയാത്രക്കിടെ
ബസിലിരുന്ന് ഉറങ്ങിപ്പോയവര്‍
സ്ഥലമേതെന്ന്
വെളിയിലേക്ക്‌ വെപ്രാളപ്പെടുമ്പോലെ
വളര്‍ന്നുപോയ ഞങ്ങളെ നോക്കി
കൗതുകം കൊണ്ടിരുന്നു
അച്ചനായി ഞാന്‍ കരിമീശവച്ചു
അമ്മയായനുജത്തി ചിരട്ടവച്ചു
കുറഞ്ഞൊരിടവേളയില്‍
ചരിത്രം വര്‍ത്തമാനത്തിന്റെ
ഭാവിയായി അഭിനയിച്ചു

കട്ടിലിന്റേയും
പഞ്ഞിമെത്തയുടേയും
കാലം വന്നശേഷം
തലയണതയ്ച്ചിട്ടില്ല അമ്മ
വെള്ളപ്പൊക്കത്തിന്റെ
ദീനക്കാര്‍ഡുകള്‍ക്ക്‌
ദാനം കൊടുത്തു
പഴയ ഉടുപ്പുകള്‍,
സാരികളൊക്കെയും.
കൊടുക്കാന്‍ നാണമുണ്ടായെങ്കിലും
വാങ്ങാന്‍ നാണമില്ലാത്ത ദാരിദ്ര്യം
അടിവസ്ത്രങ്ങള്‍ വരെ
കൊണ്ടുപോയിരുന്നു

ഇന്‍സ്റ്റാള്‍മെന്റായി വീടുവന്നു
ഇന്‍സ്റ്റാള്‍മെന്റായിത്തന്നെ വന്നൂ
പഞ്ഞിമെത്തയും തലയണയും
ടി.വി.വന്നൂ
ടേപ്പുവന്നൂ
പ്രഷറുവന്നൂ
കൊളസ്ട്രോളുവന്നൂ
വെള്ളെഴുത്തിന്റെ കണ്ണടവച്ച്‌
അമ്മയും അച്ഛനും
ടിവികാണാനിരുന്നു

കനമില്ലെങ്കിലും
വീര്‍ത്തുതന്നെയിരിക്കുന്ന
പഞ്ഞിത്തലയണകളും
കട്ടിലില്‍ നിന്നിറങ്ങി
അവര്‍ക്കൊപ്പമിരുന്നു‍
ടി.വി കാണാന്‍ കസേരയില്‍
കൂടെയുണ്ടായി ഞാനും
സിക്സര്‍..ഫോര്‍
ഹൗ സാറ്റ്‌ എന്ന് ആരവമായി
എനിക്കൊപ്പം കൂടീ അച്ഛനും

പിന്നീടൊരിക്കലും
ഉറക്കത്തില്‍ വന്നസ്വസ്ഥപ്പെടുത്തിയില്ല
വക്കുപൊട്ടിയ കാലം
ഇരുന്നുറങ്ങുന്നവര്‍ ഇരുന്നുറങ്ങി
കിടന്നുറങ്ങുന്നവര്‍ കിടന്നുറങ്ങി
സദസില്ലാതെ കവലയില്‍
പ്രസംഗിക്കുന്ന നേതാവിനെപ്പോലെ
ടി.വി.തനിയേയിരുന്നു പാടി.

പഞ്ഞി നിറച്ച പതുപതുത്ത നിദ്രയില്‍
കാലം എത്രയൊഴുകി
ഓര്‍മ്മയില്ല സഖേ !

14 അഭിപ്രായങ്ങൾ:

  1. എന്റെ ബാല്യത്തെ ഇവിടെയായിരുന്നു ഒളിപ്പിച്ചുവെച്ചിരുന്നത് അല്ലേ?
    എന്റെ ബാല്യത്തെ തിരിച്ചു താ...
    എനിക്കു വേണ്ട ഈ വര്‍ത്തമാനത്തിന്റെ പെരുപെരുപ്പ്.

    ചരിത്രം തിരുകിവെച്ച തലയിണകള്‍

    പൊട്ടിപ്പോയ ബട്ടണിലോ നൂര്‍ന്ന് ധിക്കാരിയായ ഹുക്കുകളിലോ കൊളുത്തിപ്പിടിക്കുന്ന ഓര്‍മ്മകള്‍

    പിഞ്ഞിപ്പോയ തലയണയില്‍ നിന്നും പുറത്തിറങ്ങി നടക്കുന്ന കാലം :) (ഇത്തിരി പരുത്തി പരുത്തിപഞ്ഞികൂടിയുണ്ടെങ്കില്‍ അസ്സലായി.)

    ബസിലിരുന്ന് ഉറങ്ങിപ്പോയവര്‍
    സ്ഥലമേതെന്ന്
    വെളിയിലേക്ക്‌ വെപ്രാളപ്പെടുമ്പോലെ കൌതുകം കൊള്ളുന്ന തലയിണകള്‍

    വര്‍ത്തമാനത്തിന്റെ
    ബാല്യം അഭിനയിച്ച ചരിത്രം

    ചിത്രങ്ങള്‍ വരിവരിയായ്...

    മറുപടിഇല്ലാതാക്കൂ
  2. തലയണപിഞ്ഞി പുറത്തുവരുന്നു ഇടയ്ക്കിടെ അസ്വസ്ഥപ്പെടുത്തുന്ന വാക്കുകള്‍.
    ഇഷ്ടമായി കവിത.

    മറുപടിഇല്ലാതാക്കൂ
  3. സനാതനാ, കവിത ഞാനാസ്വദിച്ചു എന്നെന്‍റെ കണ്ണുകളാണറിയിച്ചതു്.
    വിഷു ആശംസകള്‍.!

    മറുപടിഇല്ലാതാക്കൂ
  4. പിഞ്ഞിപ്പഴകിയാലും
    കവിള്‍വെച്ചുറങ്ങാന്‍
    സുഖമായിരുന്നില്ലെ
    പഴംങ്കഥപ്പാട്ടുംകേട്ട്?
    കാലം’ഫോ’മിലാകേണ്ടി
    യിരുന്നില്ല..

    മറുപടിഇല്ലാതാക്കൂ
  5. സുന്ദരം! വളരെ ഇഷ്ടപ്പെട്ടു..

    വര്‍ത്തമാനത്തിന്‍റെ വിവരണം അല്‍പം ദീര്‍ഘിച്ചെന്നോ കൂടിപ്പോയെന്നോ ഒരു തോന്നല്‌..

    മറുപടിഇല്ലാതാക്കൂ
  6. ഓര്‍മയുണര്‍ത്തുന്ന എഴുത്ത്. ഇഷ്ടമായി.

    ചിലയിടത്തൊക്കെ വേണ്ടതിലധികം പറഞ്ഞൂന്ന് ഒരുതോന്നല്‍. :)

    മറുപടിഇല്ലാതാക്കൂ
  7. ഇതു വായിച്ചപ്പോഴാണ്, ചാണകം മെഴുകിയ മുറികളുള്ള, വൈക്കോല്‍ മേഞ്ഞ ഒരു വീട് ഓര്‍മ്മ വരുന്നത് :)

    മറുപടിഇല്ലാതാക്കൂ
  8. സനാതനാ
    മിഴിവുറ്റ ചിത്രങ്ങള്‍

    കമന്റിടുന്നില്ലേലും എല്ലാം വയിക്കണ്ണ്ട് :)

    മറുപടിഇല്ലാതാക്കൂ
  9. ഏത്‌ തരം ദാരിദ്ര്യവും ഒരുണര്‍വ്വാണ്‌.ആലസ്യത്തിനെതിരെ മനുഷ്യത്വത്തിന്റെ സ്വാഭാവിക പ്രതിരോധം.സമൂഹത്തില്‍ ഒരുവന്റെ സ്വത്വം ഊട്ടിയുറപ്പിക്കുന്നത്‌ ഈ പ്രതിരോധമാണ്‌. അത്‌ നല്ലതായാലും ചീത്തയായാലും.

    കവിതയുടെ സത്ത ഞാന്‍ വായിച്ചെടുത്തത്‌ ഇങ്ങിനെയാണ്‌.

    ദാരിദ്ര്യം ജീവിതത്തില്‍ സ്രഷ്ടിക്കുന്ന വിടവിനെക്കുറിച്ചുള്ള ബോധം മനുഷ്യനെ പ്രവര്‍ത്തനോന്മുഖനാക്കിയിരിന്നു ഒരു കാലത്ത്‌.അവന്റെ ചിന്തകളെയും മാംസപേശികളെയും ഒരു പോലെ ഉത്തേജിപ്പിച്ചിരുന്ന ഒരുണര്‍ത്ത്‌ പാട്ടായിരുന്നു അത്‌.തന്റെ നിലനില്‍പ്പിനേക്കുറിച്ചുള്ള വിഹ്വലതകള്‍ നീങ്ങുമ്പോള്‍ മനുഷ്യനറിയാതെ തന്നെ ഒരു ആലസ്യത്തിനടിമപ്പെടുന്നു. അത്‌ അവനില്‍ നിന്ന് ഉത്ഭവിക്കുന്ന എന്തിനെയും ( കല,സംസ്കാരം,ചിന്ത) പ്രതിലോമമായി സ്വാധീനിക്കുന്നു.തന്റെ വേദനകളിലൂടെ സഹജീവികളുടെ ചിന്തകളെ തൊട്ടറിഞ്ഞ ഒരു മനുഷ്യന്‍ കാലയവനികയ്ക്കുള്ളില്‍ മറയുന്ന ചിത്രമാണ്‌ കവിതയുടെ അവസാനത്തെ വരികളില്‍ വരച്ച്‌ കാണിക്കുന്നത്‌.താന്‍ ആര്‍ജ്ജിച്ച സമ്പത്തിനാല്‍ നേടിയെടുക്കുന്ന പുതുജീവനോപാധികള്‍ അവനെ കൂടുതല്‍ ജഡത്വത്തിലേക്ക്‌ നയിക്കുന്നു എന്നതിന്റെ സൂചനയാണ്‌
    " പിന്നീടൊരിക്കലും
    ഉറക്കത്തില്‍ വന്നസ്വസ്ഥപ്പെടുത്തിയില്ല
    വക്കുപൊട്ടിയ കാലം
    ഇരുന്നുറങ്ങുന്നവര്‍ ഇരുന്നുറങ്ങി
    കിടന്നുറങ്ങുന്നവര്‍ കിടന്നുറങ്ങി
    സദസില്ലാതെ കവലയില്‍
    പ്രസംഗിക്കുന്ന നേതാവിനെപ്പോലെ
    ടി.വി.തനിയേയിരുന്നു പാടി.
    "
    ഈ വരികള്‍.

    ഇപ്പോഴുള്ള ഉറക്കത്തില്‍ നിന്ന് ഉണര്‍ത്താന്‍ ബട്ടണുകളോ ഹൂക്കുകളോ ഇല്ല. അതിന്റെ ഓര്‍മ്മ പോലുമില്ലെന്ന് പറഞ്ഞ്‌ കവി നിറുത്തുന്നു.

    സമകാലീന കേരളീയ ജീവിതത്തിലേക്കൊരു ചൂണ്ട്‌ പലകയായി നില്‍ക്കുന്നു ഈ കവിത.

    മറുപടിഇല്ലാതാക്കൂ
  10. തലയണഞ്ഞു കിടന്നതിലെ ചരിത്രം
    തലപൊള്ളി വായിച്ചതിലെ വരികള്‍
    തലയുണര്‍ന്ന ചിന്തയിലെ നോവ്.

    മറുപടിഇല്ലാതാക്കൂ
  11. ആ പറഞ്ഞതിലൊക്കേയും സഞ്ചരിച്ചതുകൊണ്ട് പെട്ടന്നു മനസ്സിലായി

    വളരെ നന്നായിരിക്കുന്നു

    വിഷു ആശംസകള്‍

    മറുപടിഇല്ലാതാക്കൂ