29/8/09

പുതുവഴികൾ

ഞാൻ ചീത്തയാണ്‌.
ഒരു മനുഷ്യന്‌ എത്രത്തോളം
ചീത്തയാകാമോ അത്രത്തോളം.
ആധികമാർക്കും അറിയില്ല
ഈ സത്യം.
അറിഞ്ഞവർ ആരോടും പറഞ്ഞിട്ടുമില്ല.

ചീത്തയായിരിക്കുന്നത്‌
അത്ര നല്ലകാര്യമല്ല എന്നെനിക്കറിയാം.
"നല്ലവാക്കോതുവാൻ ത്രാണിയുണ്ടാകണം"
എന്ന ഈണത്തിൽ
ചീത്തയാകാതിരിക്കുന്നതിനായി
സന്ധ്യപ്രാർത്ഥനകൾ ഞാൻ നടത്തിയിട്ടുണ്ട്‌.
പാപബോധങ്ങളുടെ പരുന്തു
റാഞ്ചിയ കോഴിക്കുഞ്ഞായി
കൽവിളക്കുകൾക്കു മുന്നിൽ
വിറകൊണ്ടിട്ടുണ്ട്‌.

ആദ്യമായി മുഷ്ടിമൈഥുനം
ചെയ്ത രാത്രി
ഏറ്റവും അടുപ്പമുള്ള ആരോ
മരിച്ചുപോയാൽ എന്നവണ്ണം.
കരഞ്ഞു വെളുപ്പിച്ചു.
വെളുത്ത രാത്രി
പകലിനെ ശവക്കച്ചപോലെ പുതപ്പിച്ചു.
ആദ്യമായി മദ്യപിച്ചപ്പോഴും
പടുകൂറ്റൻ ഒരു കരച്ചിൽ
എന്റെമീതേ ഉരുൾപൊട്ടി,
വേരുപോയ മരം പോലെ
ഉരുൾ എന്നെ കിടപ്പറകൾക്കും
കക്കൂസുകൾക്കും മീതെ
ഒലിപ്പിച്ചു.
കാമുകിയുടെയായിരുന്നെങ്കിലും
ആദ്യത്തെ സ്ത്രീലിംഗത്തിലേക്കുള്ള കടലിടുക്ക്‌
എന്നെ കരച്ചിലിന്റെ പായ്ക്കപ്പലാക്കിമാറ്റി
കാറ്റിനുപോലും വിട്ടുകൊടുക്കാതെ
അവൾ എന്നെ അവളുടെ തടവറയിലേക്ക്‌
തുഴഞ്ഞു.
ഏറ്റവും ഒടുവിൽ ജാരനായി
ഒളിവുജീവിതം നയിക്കുമ്പോഴാണ്‌
കരച്ചിലിന്റെ ഉപന്യാസമായി
എന്നെ ഒരു പെണ്ണ്‌ വായിച്ചുതീർത്തത്‌.

ഇതു കേൾക്കൂ
ഓരോ തവണ ചീത്തയാകുമ്പൊഴും
നന്നങ്ങാടികളിൽ നിന്നെന്നപോലെ
പഴക്കം ചെന്ന രോദനങ്ങൾ
എന്നിൽ ഉയരാറുണ്ട്‌.
തൊണ്ടയിൽ കുടുങ്ങിയ മീന്മുള്ളുപോലെ
അത്‌ എന്റെ ചിരികളേയും
വർത്തമാനങ്ങളേയും നിയന്ത്രിക്കാറുണ്ട്‌.
ഏനിക്കറിയാം
ചീത്തയായിരിക്കുന്നതൊരിക്കലും
സ്വസ്ഥതയുള്ള ഒന്നല്ലെന്ന്‌.

ഏന്നാൽ നല്ലവരായിരിക്കുന്നവരേ
നിങ്ങൾക്കറിയാമോ
ചീത്തയായിരിക്കുന്നതിൻ സുഖം?
അതിൻ ലഹരി ഒന്നുകൊണ്ടുമാത്രം
നന്നാവാനുള്ള എത അവസരങ്ങൾ
ഞാൻ നിരാകരിച്ചെന്ന്‌.
എന്റെ പ്രശ്നം ഇപ്പോൾ ഇതൊന്നുമല്ല
ആവർത്തിച്ചുള്ള ചീത്തയാകലുകൾ
എന്നെ ചീത്തയല്ലാതായിത്തീർത്തിരിക്കുന്നു.
എത്ര കുടിച്ചാലും മത്തുപിടിക്കാത്ത
മദ്യപനെപ്പോലെ,
എത്ര നീണ്ടാലും സ്ഖലിക്കാതെ
പാതിയിൽ ക്ഷയിക്കുന്ന സുരതമ്പോലെ,
എത്ര മാറ്റിക്കിടത്തിയാലും വിരസത
ശയിക്കുന്ന കട്ടിൽ പോലെ..

എങ്ങനെ ഞാൻ പരിചയപ്പെടുത്തട്ടെ
ചീത്തയാവുന്നതിനുള്ള പുതുവഴികൾ
തേടിക്കൊണ്ടിരിക്കുന്ന എന്നെ..!

7 അഭിപ്രായങ്ങൾ:

  1. കുളിച്ച് കുറി തൊട്ട് നടക്കുബോഴും വ്രത്തിയാക്കാന്‍ മറക്കുന്ന ഇടം
    മലയാളി സുഗന്ദം ആശിക്കുന്നവര്‍ക്ക് ചൂന്‍ടിക്കണിക്കാന്‍ പറ്റിയ ഇടം
    ബസ് സ്റ്റാന്‍ടിലെ ബഹു കേമം

    മറുപടിഇല്ലാതാക്കൂ
  2. അവസാനത്തെ മൂന്നു വരികൾ വെട്ടിക്കളഞ്ഞ് ഞാൻ വീണ്ടും വായിക്കുന്നു. അടുത്തകാലത്ത് വായിച്ച ഒരു നല്ല കവിതയിലൂടെ സഞ്ചരിക്കുന്നു.ഇതിനെ പറ്റി കൂടുതലെഴുതാൻ തോന്നുന്നു.

    മറുപടിഇല്ലാതാക്കൂ
  3. ഇന്ത്യയില്‍ നമുക്കൊരു ചൊല്ലുണ്ട്.ഏതെങ്കിലും കവിയുടെ കവിത നിങ്ങള്‍ ഇഷ്ടപ്പെടുകയാണെങ്കില്‍ , ഒരിക്കലുംകവിയെ കാണാന്‍ പോകരുത്.കാരണം , അപ്പോള്‍ നിങ്ങള്‍ നിരാശനാകും .നിങ്ങള്‍ വളരെ സാധാരണക്കാരനായമനുഷ്യനെ ആണ് കണ്ടെത്തുക.സാധാരണ ജനങ്ങളെക്കാളും കൂടുതല്‍ സാധാരണക്കാരന്‍ ആയ ഒരുവനെ അല്ലെങ്കില്‍
    നിങ്ങള്‍ വൃത്തിക്കെട്ട ആരെയെങ്കിലുമാണ് കണ്ടെത്തുക

    മറുപടിഇല്ലാതാക്കൂ
  4. ഹാവൂ!
    തന്റെ എല്ലാ ചീത്തത്തങ്ങളും ഞാനും ഒപ്പുവെയ്ക്കുന്നു.
    നമ്മൾ സഹോദരരാണു ഡിയർ:)
    ഇത്രമേൽ കാൽ‌പ്പനികമധുരമായ ഒരു പേര് എനിക്കു ബ്ലോഗുണ്ടാക്കുമ്പോൾ തോന്നാത്തതിൽ ഞാൻ ലജ്ജിക്കുന്നു.:)

    മറുപടിഇല്ലാതാക്കൂ
  5. സനലേട്ട എനിക്കും കുറിച്ച് പുതു വഴികള്‍ കിട്ടിയാല്‍ കൊള്ളാം

    മറുപടിഇല്ലാതാക്കൂ
  6. മരിയ്ക്കും വരെ മരിക്കാതെ
    ജീവിക്കുന്നതിന്റെ ജീവന താളം.

    മറുപടിഇല്ലാതാക്കൂ