20/10/09

മരങ്ങൾ ഇണചേരുമോ !



രാത്രി വൈകി,
തോപ്പിനും തോടിനും നടുവിലൂടെ
വീടിലേക്കിഴഞ്ഞ് പോകുന്ന വഴിയേ നിശബ്ദം,
കവിത തിരഞ്ഞ് നടക്കുകയായിരുന്നു ഞാൻ.
നിലാവിന്റെ ഇരുൾ വെളിച്ചത്തിൽ
ഇരു വശവും മരങ്ങളുടെ ചലനങ്ങൾ
എന്നെ സംശയാലുവാക്കി.
ഇലകൾ പൊഴിച്ച് നഗ്നമായ മേനി
പരസ്പരം കാട്ടിയും
തൊട്ടുനോക്കിയും
ഉരുമ്മിയുമ്മവച്ചും
അവ തങ്ങളിൽ തങ്ങളിൽ പങ്കുവെയ്ക്കുന്നു.
പറിഞ്ഞുപോരുമോ എന്ന് തോന്നിക്കുമാറ്
വലിഞ്ഞ് മുറുകിയ വേരുകൾ മീട്ടി
ഗാഢമായൊരു തന്ത്രിവാദ്യമാകുന്നു.
ജലത്തിൽ വീഴുന്ന നിഴലുകൾ നാഗരൂപികളായി
പിണഞ്ഞ് ചുംബിക്കുന്നു.
മരങ്ങൾ ഇണചേരുമോ !
എന്റെ സംശയം വായ് പിളർന്നു.
എല്ലാ ചലനങ്ങളും ഒരു നിമിഷത്തേക്ക് നിലച്ചു
പെട്ടെന്നേതോ ഇളമരം
ഒച്ചകളെല്ലാം ഉള്ളടക്കം ചെയ്ത ഒരു നിശ്വാസം
കാറ്റെന്ന് കള്ളം പറഞ്ഞ്
ആകാശത്തിലേക്ക് ഊതിവിട്ടു
മേഘങ്ങളുടെ തടുപ്പില്ലാതെ മുനിഞ്ഞു നിന്നിരുന്ന
നക്ഷത്രങ്ങളും അമ്പിളിക്കണ്ണും
തിരിതീർന്ന മണ്ണെണ്ണ വിളക്കുകൾ പോലെ
ഒറ്റമാത്രയിൽ കെട്ടുപോയി.
പ്രണയപാരവശ്യങ്ങളുടെ ശീൽക്കാരം മാത്രം പിന്നീട് കേട്ടു...

10 അഭിപ്രായങ്ങൾ:

  1. അല്ലല്ല,ഇണചേരലിന്റെ ഭയജനകമായ കാഴ്ച

    മറുപടിഇല്ലാതാക്കൂ
  2. നന്നായിരിക്കുന്നു.വേരുകളും വെള്ളത്തിലെ ബിംബവും..,ഇണചേരലിന്റെ സീല്‍ക്കാരവും..
    പാവം മരങ്ങള്‍ അല്ലെ,കവിതകളിലല്ലെ അവക്ക് ഇണചേരാനാവൂ..

    മറുപടിഇല്ലാതാക്കൂ
  3. ചിത്രകാരന് പോലും വരക്കാനാവാത്ത ചിലത്.കവി ചിത്രകാരനാകുന്ന നിമിഷങ്ങള്‍..

    മറുപടിഇല്ലാതാക്കൂ
  4. കവിത ഞാന്‍ എത്ര പ്രാവശ്യം വായിച്ചെന്നറിയില്ല, ഓരോ പ്രാവശ്യവും ഓരോ അനുഭൂതി...രതി മാത്രമല്ല, ഒരു സ്പിരിച്വല്‍ അനുഭവം...

    മറുപടിഇല്ലാതാക്കൂ
  5. സത്യം........ വെള്ളമടി എത്രയെത്ര നവ കാഴ്ചകളാണ് നമുക്കായി ഒരുക്കി വയ്ക്കുന്നത്! .....
    തമാശ പറഞ്ഞതാണ് ചേട്ടായി....
    വ്യത്യസ്തമായ കവിത....
    എന്തൊക്കെയോ ചിന്തകള്‍ മനസ്സിലൂടെ പാഞ്ഞു പോയി.......
    ഇനിയും ആരും കാണാത്തതൊക്കെ കണ്ടു, പറഞ്ഞു തരിക..............

    മറുപടിഇല്ലാതാക്കൂ