29/11/09

എത്ര ലളിതം



എത്ര നിസാരമായും ഒരു കൊലപാതകം നടത്താം.
പക്ഷേ നിനക്കതറിയില്ല.
പെരുവിരലും ചൂണ്ടുവിരലും ചേർത്തമർത്തി
ഞാൻ പുഴുക്കളെ കൊല്ലുന്നത് കണ്ട് നീ ഛർദ്ദിച്ചു.
പുഴു ചത്തതിലല്ല, എന്റെ വിരലിൽ
അതിന്റെ ചലം പുരണ്ടതിലായിരുന്നു നിനക്ക് പ്രശ്നം.
ഒരു കല്ലെടുത്ത് പുഴുവിന്റെ തലയിൽ
ഇടിച്ചാൽ മതിയായിരുന്നു.
നീ പറഞ്ഞു.
കഴുത്ത് കയർ പോലെ പിരിച്ച് ഞാൻ
ഒരു കോഴിയെ കൊന്നത് കണ്ടും നീ ചുറ്റി വീണു.
കോഴി ചത്തതിലല്ല അതിന്റെ ആ പിടപിടപ്പ്
ഞാൻ കണ്ടു നിന്നതിലാണ് നിനക്ക് പ്രശ്നം.
ദൂരെയെവിടെയെങ്കിലും കൊണ്ട്പോയി
കെട്ടിത്തൂക്കിയിട്ടു പോന്നാൽ മതിയായിരുന്നു
നീ പറഞ്ഞു.
പാറ്റകളെ, ചിലന്തികളെ, കരിച്ചകളെ ഞാൻ
നഗ്നപാദം കൊണ്ട് ചവുട്ടിക്കൊന്നാൽ
നീ നിലവിളിക്കും,
ഒരു ചൂലെടുത്ത് തല്ലിക്കൊല്ലൂ എന്ന്.
ഉറുമ്പുകളെ ചുവരോട് ചേർത്ത് കൈപ്പത്തികൊണ്ട് ഞെരിച്ചാൽ
നിനക്കിഷ്ടമാവില്ല.
എന്തായാലും അവറ്റകൾ ചാവുകയല്ലേ,
എന്തായാലും ഞാൻ കൊല്ലുകയല്ലേ,
പിന്നെ എന്താണൊരു വ്യത്യാസം...?
നിനക്ക് എല്ലാം സങ്കീർണമാക്കണം.
നിനക്കറിയില്ലല്ലോ,
എത്ര എളുപ്പത്തിൽ ഒരുകൊലപാതകം നടത്താമെന്ന്.
ഒരുനാൾ അത് നീ പഠിക്കും,
ഞാൻ നിന്നെയോ നീ എന്നെയോ കൊല്ലുമ്പോൾ.
ലളിതമായി എത്രയും ലളിതമായി....

10 അഭിപ്രായങ്ങൾ:

  1. “എന്തായാലും അവറ്റകൾ ചാവുകയല്ലേ,
    എന്തായാലും ഞാൻ കൊല്ലുകയല്ലേ,
    പിന്നെ എന്താണൊരു വ്യത്യാസം...? “

    ഈ കവിത എനിക്കു തന്നത് ഒരു മറുപടിയാണ്.

    മറുപടിഇല്ലാതാക്കൂ
  2. ഒരുനാൾ അത് നീ പഠിക്കും,
    ഞാൻ നിന്നെയോ നീ എന്നെയോ കൊല്ലുമ്പോൾ.
    ലളിതമായി എത്രയും ലളിതമായി....


    എത്ര ലളിതമായിരിക്കുന്നു ...നല്ല വരികള്‍

    മറുപടിഇല്ലാതാക്കൂ
  3. നമുക്ക് ഇനി അങ്ങോട്ട്‌ കൊന്നു പഠിക്കാം.
    നാളെകളില്‍ ആദ്യം സഹിക്കാന്‍
    പാറ്റാതെ വരുന്നത് നമ്മില്‍ ആരാന്നു നമുക്കറിയില്ലല്ലോ .
    അറയ്ക്കരുത് ആരായാലും അത്രമാത്രം

    മറുപടിഇല്ലാതാക്കൂ
  4. ആദ്യത്തെ ഒരു ഇരുപത് വരികള്‍.. എന്നെ അതിശയിപ്പിച്ചു..അവസാനം......അവസാനം കവിത തികച്ചും എനിക്ക് അന്യമായി...! നന്ദി....

    മറുപടിഇല്ലാതാക്കൂ
  5. അതു പഠിക്കുമായിരിക്കും...അല്ലേ....ഇനി അതു പഠിക്കാനിരിക്കുന്നതേ...ഉള്ളോ...?
    കൊലപാതകങ്ങളൂടെ ഈ പെരുമഴക്കാലത്ത്..?..
    ഒരു ചെറീയ സംശയം...മാത്രം..

    മറുപടിഇല്ലാതാക്കൂ
  6. I'm appreciate your writing skill.Please keep on working hard.^^

    മറുപടിഇല്ലാതാക്കൂ