21/1/08

കള


ഇല്ല മറ്റൊരാള്‍
എന്നെപ്പോലെങ്ങും
ചുറ്റിലുമുള്ളവര്‍
എല്ലാമൊരുപോലെ.
ഒരേ രൂപം ഒരേ ഭാവം
ഒരേ നിറം ഒരേ സ്വഭാവം
സ്വരം പോലുമൊന്നാണവര്‍ക്ക്

വിതക്കാതെ മുളച്ചവന്‍
നനയ്കാതെ വളര്‍ന്നവന്‍
താങ്ങുകമ്പില്ലാതെ
തനിയേ പടര്‍ന്നവന്‍
ചുറ്റിലുമില്ല എന്നെപ്പോലൊരാള്‍.

എന്റെ മാത്രം രൂപമെനിക്ക്
എന്റെ മാത്രം ഭാവമെനിക്ക്
എന്റെ മാത്രം പൂക്കള്‍
എന്റെ മാത്രം കായ
എന്റെ മാത്രം വിത്തുവിതരണ
സമ്പ്രദായങ്ങള്‍
ഇവിടെയീ കണ്ണെത്തും
ദൂരത്തില്‍ ഞാനേയുള്ളൂ
വ്യത്യസ്തനായൊരാള്‍

ഒരുപോലെയിലയുള്ളവര്‍
ഒരുപോലെ പൂവുള്ളവര്‍
വളവും നനയും കിട്ടി
തഴച്ചു കൊഴുത്തവര്‍
പൂത്തുമലച്ചവര്‍
കായ്ച്ചുമറിഞ്ഞവര്‍.
അവരോടു ചിറികോട്ടി
ഞാന്‍ ചോദിച്ചു.
പുളുന്താന്മാരേ എന്തവകാശം
നിങ്ങള്‍ക്കെന്നെ വിമര്‍ശിക്കാന്‍ ?

നാവിറങ്ങിയപോലെയവര്‍
അനങ്ങാതെ നിന്നപ്പോള്‍
കരുതി ഞാന്‍
മുട്ടിയല്ലോ ഉത്തരം !
ചിരിപൊട്ടിയുന്മത്തനായി
മരുവുമ്പോളഹോ കഷ്ടം
ഞാനറിഞ്ഞില്ലല്ലോ
അവരെപ്പോലെ
അല്ലായ്കയാലെന്നെ
പിഴുതെറിയാനൊരു
കൈ നീണ്ടു നീണ്ടു
വരുന്ന കാര്യം.

Image by Will Simpson

19 അഭിപ്രായങ്ങൾ:

  1. സനാതനന്‍...

    കള.....
    മനോഹരമായിരിക്കുന്നു...

    ജീവിത കള പോലെ.....അഭിനന്ദനങ്ങള്‍

    നന്‍മകള്‍ നേരുന്നു

    മറുപടിഇല്ലാതാക്കൂ
  2. അല്പം നീണ്ടുപോയോ എന്നു സംശയം.

    ആശയം വളരെ നന്നായി

    മറുപടിഇല്ലാതാക്കൂ
  3. വിതക്കാതെ മുളച്ചവന്‍
    നനയ്‌കാതെ വളര്‍ന്നവന്‍

    നന്നായി

    മറുപടിഇല്ലാതാക്കൂ
  4. ഒരു ഉറപ്പ് വാങ്ങിപ്പോയി ഇല്ലെങ്കില്‍ പറയാമായിരുന്നു :)

    മറുപടിഇല്ലാതാക്കൂ
  5. ഒരു ബ്ലോഗ് തുടങ്ങി...
    കാലമാടന്‍
    (കമന്റ് ദുരുപയോഗം സദയം ക്ഷമിക്കുക; എല്ലാവര്‍ക്കും വേണ്ടത് പബ്ലിസിറ്റി ആണല്ലോ...)

    മറുപടിഇല്ലാതാക്കൂ
  6. ഒരു ബ്ലോഗ് തുടങ്ങി...
    കാലമാടന്‍
    (കമന്റ് ദുരുപയോഗം സദയം ക്ഷമിക്കുക; എല്ലാവര്‍ക്കും വേണ്ടത് പബ്ലിസിറ്റി ആണല്ലോ...)

    മറുപടിഇല്ലാതാക്കൂ
  7. കാലമാടാ
    എന്തിനാ നാലുപ്രാവശ്യം എന്നെയങ്ങനെ വിളിച്ചതെന്ന് മനസിലാകുന്നില്ല.പൂര്‍വ്വ വൈരാഗിയാണോ :)

    മറുപടിഇല്ലാതാക്കൂ
  8. മലയാളം ബ്ലോഗുകളെ സംബന്ധിച്ച് ഓര്‍ക്കുമ്പോള്‍ സന്തോഷം തരുന്ന ചില വിളകളുണ്ട്.അതിലൊന്നാണ് എട്ടു മാസം പ്രായമുള്ള ഈ ബ്ലോഗ്.എഴുത്തിന്റെ നൈരന്തര്യം പലപ്പോഴും വിഷയങ്ങളുടെയും ശൈലിയുടേയും ആവര്‍ത്തനം കൊണ്ട് വിരസമാക്കിയേക്കും.എന്നാല്‍ ഇവിടെ ഓരോ കവിതയും നാള്‍ക്കുനാള്‍ മെച്ചപ്പെടുന്ന ഒരു കവിയുടെ അടയാളങ്ങളായി എന്നെ അത്ഭുതപ്പെടുത്തുന്നു.

    100 കവിതകള്‍ കൊണ്ട് അനുഗൃഹീതമാവുന്ന സനാതനത്തിനും അതിനു പിന്നിലെ സ്നേഹസ്വരൂപനായ മനുഷ്യനും എല്ലാ നന്മകളും നേരുന്നു.

    മറുപടിഇല്ലാതാക്കൂ
  9. സ്നേഹസ്വരൂപനോ ..... വിഷ്ണുമാഷേ ചുമ്മ നുണ പറയരുത്ട്ടോ. ഞാന്‍ അടി കൂടി പഠിച്ചത് തന്നെ ഈ കളരിയിലാ. പിന്നെ സ്നേഹം ഉണ്ടോന്ന് ചോദിച്ചാല്‍ “ ഓ കുഴപ്പമില്ല “ എന്ന് വേണേല്‍ പറയാം :).

    എന്തായാലും നൂറ് കവിതകള്‍ക്ക് നൂറ്റിയൊന്ന് ആശംസകള്‍

    മറുപടിഇല്ലാതാക്കൂ
  10. എട്ടിലൊരാളായി എന്നെയും കൂട്ടുമോ?കളയെങ്കിലുമായി.... നന്നായിട്ടോ!!!

    മറുപടിഇല്ലാതാക്കൂ
  11. സനാതനന്‍ നൂറടിച്ചോ...

    എങ്കില്‍ ഒരു നൂറടിക്കണം ഇന്ന്...ചിയേഴ്സ്...

    (കള പല അര്‍ഥങ്ങളില്‍ വായിക്കാവുന്ന ഒന്നാണു കേട്ടോ..ഗുപ്തന്‍ പറഞ്ഞ സംശയം എനിക്കുമുണ്ട്..)

    മറുപടിഇല്ലാതാക്കൂ
  12. വിതക്കാതെ മുളച്ചവന്‍
    നനയ്‌കാതെ വളര്‍ന്നവന്‍

    നല്ല വരികള്‍

    മറുപടിഇല്ലാതാക്കൂ
  13. 100 കവിതകള്‍ കൊണ്ട് അനുഗൃഹീതമാവുന്ന സനാതനത്തിനും എല്ലാ നന്മകളും നേരുന്നു.

    മറുപടിഇല്ലാതാക്കൂ
  14. നൂറാം കവിതയാണല്ലെ?
    ഒറ്റയായാലെന്ത്?
    ഇതാണല്ലൊ ശരിയായവിള സനാതനാ..

    മറുപടിഇല്ലാതാക്കൂ
  15. നൂറാമത്തേത് കളയായിരുന്നോ. പിഴുതെറിഞ്ഞിട്ടും പോകാത്ത ചില കളകള്‍!

    മറുപടിഇല്ലാതാക്കൂ
  16. നൂറിനു ആശംസകള്‍..

    “വിതക്കാതെ മുളച്ചവന്‍
    നനയ്കാതെ വളര്‍ന്നവന്‍
    താങ്ങുകമ്പില്ലാതെ
    തനിയേ പടര്‍ന്നവന്‍
    ചുറ്റിലുമില്ല എന്നെപ്പോലൊരാള്‍.“

    ഈ വരികള്‍ കൂടുതല്‍ ഇഷ്ടമായി...

    മറുപടിഇല്ലാതാക്കൂ