11/12/07

മ്മ്ാ‍ാ‍ാ‍ാ‍ാ‍ാ‍ാ‍ാ

നിങ്ങള്‍ക്കറിയാമോ,
ഏറെക്കാലം മുന്‍പ്
എനിക്കറിയാമായിരുന്ന
ഒരേയൊരു വാക്ക്
മ്മ്ാ‍ാ‍ാ‍ാ‍ാ‍ാ‍ാ‍ാ
മാത്രമായിരുന്നു.

നിങ്ങള്‍ ശബ്ദതാരാവലി
നോക്കരുത്
കാണുന്നുണ്ടാവില്ല
കണ്ടില്ലെന്നു വച്ച്
എന്നെ നോക്കി
ചിരിക്കുകയും അരുത്.

കാരണം എനിക്ക്
അറിയാമായിരുന്നതില്‍
ഏറ്റവും അര്‍ത്ഥപൂര്‍ണമായ വാക്കായിരുന്നു,
മ്മ്ാ‍ാ‍ാ‍ാ‍ാ‍ാ‍ാ‍ാ
ആ ഒറ്റവാക്കുകൊണ്ടുമാത്രം
ഞാന്‍ എണ്ണമറ്റ അര്‍ഥങ്ങളുടെ
അനന്തകോടി വികാരങ്ങള്‍
വിനിമയം ചെയ്തിരുന്നു.

വിശക്കുമ്പോള്‍
മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന വാചകം എനിക്ക്
വയറു നിറയെ പാല്‍ തന്നു.
വേദനിക്കുമ്പോള്‍
മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന വാചകം എനിക്ക്
കരുണയുള്ള സ്പര്‍ശങ്ങള്‍ തന്നു.
പേടി തോന്നുമ്പോള്‍
മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന വാചകം എനിക്ക്
നെഞ്ചോടണച്ചുള്ള സാന്ത്വനം തന്നു.
ഉറക്കം വരുമ്പോള്‍
മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന വാചകം എനിക്ക്
മതിയാവോളം താരാട്ടു തന്നു.

മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന ഒറ്റവാചകത്തില്‍
എന്റെ ഉള്ളിലുരുവമാകുമായിരുന്ന
ഓരോ തോന്നലുകളേയും ഞാന്‍
എന്റെ ചുറ്റിലേക്കും സംവേദിപ്പിച്ചിരുന്നു
വൃദ്ധര്‍,യുവാക്കള്‍,യുവതികള്‍
ആരുമാകട്ടെ അവര്‍
ഞാന്‍ പറയുന്നത്
അതേപടി തിരിച്ചറിഞ്ഞു.
മ്മ്‍ാ‍ാ‍ാ‍ാ‍ാ‍ാ‍ാ‍ാ
എന്ന ഒറ്റവാക്കുകൊണ്ട്
ഞാന്‍ തീര്‍ത്തിരുന്ന
മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന ഒറ്റവാചകത്തിലൂടെ.

ഇപ്പോള്‍ എനിക്ക്
എത്ര വാക്കുകള്‍ അറിയാമെന്ന്
എനിക്കുപോലുമറിയില്ല.
എത്ര വാചകങ്ങള്‍
എത്ര ഈണങ്ങള്‍
എത്ര ഇമ്പങ്ങള്‍...!

ഇപ്പോള്‍ എനിക്ക്
നാല് ഭാഷകള്‍ തന്നെയറിയാം
അഞ്ചാമതൊന്ന് എന്നിലേക്ക്
കടന്നു വന്നുകൊണ്ടിരിക്കുന്നു.
പക്ഷേ ഇപ്പോള്‍
മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന വാക്കിന്റെ അര്‍ത്ഥം
എനിക്കറിയില്ല
മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന വാക്കുകൊണ്ട്
എങ്ങനെയാണ് അര്‍ത്ഥമുള്ള
വാക്യങ്ങള്‍ തീര്‍ക്കുന്നതെന്ന്
എനിക്കോര്‍മ്മയില്ല

പൊളിഞ്ഞുപോയ ഒരു
ഫാക്ടറിക്കുള്ളില്‍ ഉപേക്ഷിക്കപ്പെട്ട
യന്ത്രഭാഗങ്ങളെപ്പോലെ,
പഴകും‌തോറും കാലം
ദുരൂഹമാക്കിക്കൊണ്ടിരിക്കുന്ന
എന്റെ ഉള്‍വശം.
ഓരോശ്വാസത്തിലും
ഞാന്‍ അനുഭവിക്കുന്ന ഓര്‍മ്മകളുടെ
ചലം തികട്ടിവരുന്ന മണം.
ഞാന്‍ എന്ന വാക്കുകൊണ്ട്
എനിക്കു വരച്ചുതരാന്‍ കഴിയാത്ത
ഞാന്‍ എന്ന ഞാന്‍...
പെരുമ്പാമ്പുകളുടെ പുറത്തെ
വലിയ വട്ടങ്ങള്‍പോലെ
വിഴുവിഴുപ്പോടെ എന്നിലൂടെ
ഇഴഞ്ഞസ്തമിക്കുന്ന ചിന്തകള്‍...

എനിക്കറിയാവുന്ന
കോടാനു കോടി വാക്കുകള്‍ കൊണ്ട്
എന്റെ ഉള്ളിലുള്ളതെന്തെന്ന്
പകര്‍ത്തിത്തരാന്‍ എനിക്കാവുന്നില്ല.
ഞാന്‍ എന്റെ സങ്കടങ്ങള്‍
പറയുമ്പോള്‍, ഹാസ്യമാണതെന്ന്
നിങ്ങള്‍ ചിരിക്കുന്നു.
എന്റെ സന്തോഷങ്ങള്‍
പറയുമ്പോള്‍,ഹാ കഷ്ടം
എന്നു നിങ്ങള്‍ ദുഃഖിക്കുന്നു
എന്റെ രോഷം പറഞ്ഞാല്‍
എന്തുനല്ല ഈണമെന്ന്
നിങ്ങള്‍ പാടി രസിക്കുന്നു.

ഞാനിതാ,
അസ്തമിച്ചുപോയ
ഒരു സാമ്രാജ്യത്തില്‍ നിന്നും
പില്‍ക്കാ‍ലത്ത് കുഴിച്ചെടുക്കപ്പെട്ട
നാണയവും ഉയര്‍ത്തിപ്പിടിച്ചെന്നപോലെ
നിങ്ങള്‍ക്കു മുന്നില്‍ നില്‍ക്കുന്നു
മ്മ്ാ‍ാ‍ാ‍ാ‍ാ‍ാ‍ാ‍ാ
എന്ന വാക്കുമായി.
വിനിമയം ചെയ്യാനാവാത്ത
ചിന്തകളുമായി.....

19 അഭിപ്രായങ്ങൾ:

  1. ഹരിശ്രീ കുറിക്കുന്നു. ഒരഭിപ്രായവും പറയാന്‍ ആവാത്തത്രയൂം അനുഭവനീയം

    മറുപടിഇല്ലാതാക്കൂ
  2. "മ്മ്ാ‍ാ‍ാ‍ാ‍ാ‍ാ‍ാ‍ാ"
    എന്ന അക്ഷരം. അതില്‍നിന്നുതിര്‍ന്നു വീണ വാക്കുകള്‍‍, വാക്യങ്ങള്‍‍.എല്ലാ പൊരുളുകളേയും ഒതുക്കി സം‌വേദിക്കുന്ന ആദി ശബ്ദത്തിന്‍റെ അനുഭവവേദ്യമായ പ്രതലം. ഞാനീ പറയാന്‍ ശ്രമിച്ചതെല്ലാം,"മ്മ്ാ‍ാ‍ാ‍ാ‍ാ‍ാ‍ാ‍ാ" യില്‍‍ ഒതുങ്ങുന്നു.:)

    മറുപടിഇല്ലാതാക്കൂ
  3. വളരെ നന്നായിരിക്കുന്നു, മാഷേ.

    :)

    മറുപടിഇല്ലാതാക്കൂ
  4. സനാതനാ,
    ഭാഷകള്‍ നാലല്ല, നാല്‍പതറിഞാലും കാലുകള്‍ രണ്ടല്ല, പന്ത്രണ്ടുണ്ടായാലും മ്മാ.. എന്ന വാക്കിന്റെയര്‍ത്ഥമെവിടേയുമൊന്നുതന്നെ

    സംശയം പിന്നെയും, മ്മാ എന്ന വാചകമോ? വാക്കോ? ഒരു വാചകം എപ്പോഴും മറ്റുവാക്കുകളെ കൂട്ടുപിടിച്ഛേ വരൂ.. ഒറ്റയ്ക്ക് ധൈര്യമില്ല... ‘മ്മാ‘ ഒറ്റയ്ക്കുവരുന്ന വാക്കല്ലേ?
    അതെ, ‘മ്മാ’ എന്നും ഒറ്റയ്ക്കായിരുന്നു, ഇന്നും!

    മറുപടിഇല്ലാതാക്കൂ
  5. മ്മ എന്ന വാക്കിലല്ലോ അമ്മിഞ്ഞ പ്പാല്‍
    മ്മ എന്ന നോക്കിലല്ലോ തെളിനീരുതെളിയുന്ന സ്നേഹ പ്രവാഹം
    മ്മ എന്ന കേള്‍വിയിലല്ലോ ബധിരന്‍റെ കണ്ണില്‍ തിരതള്ളിയെത്തും പ്രകാശം
    ഈ കവിത വായിച്ചപ്പോള്‍ പുരാണ കഥ ഓര്‍മ്മ വന്നു.
    സുബ്രഹ്മണ്യന്‍ ‘ഓം’ എന്ന വാക്കിന്‍ റെ അര്‍ത്ഥം ചോദിക്കുന്ന ഒരു കഥയുണ്ട്. ‘ ഓം’ എന്ന വാക്കില്‍ സര്‍വ്വവും അടങ്ങിയിട്ടുണ്ടെന്ന പോലെ ‘മ്മ’ എന്ന വാ‍ക്കിലും.

    സനാതന്‍ റെ ഞാന്‍ വായിച്ച കവിതകളില്‍ ഏറ്റവും അര്‍ത്ഥ സമ്പുഷ്ടമായ കവിതയാണിത്.
    നിറയെ സ്നേഹം അനുഭവിപ്പിക്കുന്ന കവിത എന്നും ഒരു മുതല്‍കൂട്ട് തന്നെ. അത് നിറഞ്ഞതു കൂടിയാകുമ്പോള്‍.

    സ്നേഹപൂര്‍വ്വം
    ഇരിങ്ങല്‍

    മറുപടിഇല്ലാതാക്കൂ
  6. മാ‍ാ‍ാ‍ാ‍ാ‍ാ‍ാ‍ാ‍ാ‍ാ‍ാ‍ാ
    നന്നായിരികുന്നമ്മാ‍ാ‍ാ‍ാ‍ാ‍ാ‍ാ‍ാ‍ാ‍ാ‍ാ‍ാ‍ാ‍ാ

    മറുപടിഇല്ലാതാക്കൂ
  7. mma.....
    നന്നായിരിക്കുന്നു...........
    നാടോടി.................

    മറുപടിഇല്ലാതാക്കൂ
  8. അമ്മ .... എന്ത്‌ മനോഹരമായ പദം.എന്റെ ഇട നെഞ്ചില്‍ കുളിരുകോരിയിട്ടത്‌ പോലെ

    മറുപടിഇല്ലാതാക്കൂ
  9. വായിച്ച് സ്തബ്ധനായിപ്പോയി.
    ഒന്നും പറയാനില്ല. നന്ദി എന്നതൊഴിച്ച്.

    മറുപടിഇല്ലാതാക്കൂ
  10. ഇന്നിപ്പൊളെത്രവാക്കുണ്ടെങ്കിലും പോരാ എന്നായിരിക്കുന്നു..ആദ്യസ്വരം മറന്നപ്പോള്‍
    ഏദന്‍തോട്ടം നഷ്ടപ്പെട്ടപോലെയായി,അല്ലെ സനാതനാ?

    മറുപടിഇല്ലാതാക്കൂ
  11. നന്നായി സുന്ദരമായ അഖ്യാന ശൈലി. ഇഷ്ടപ്പെട്ടു.

    മറുപടിഇല്ലാതാക്കൂ
  12. സമ്പുഷ്ടമായ കവിത...........
    വളരെ നന്നായിരിക്കുന്നു.......

    മറുപടിഇല്ലാതാക്കൂ
  13. സനാതനാ
    നെഞ്ചിലൊരു വല്ലാത്ത കഴപ്പ്. മ്മമ്മാ‍ാ എന്ന എന്റെ കുഞ്ഞിന്റെ വിളികേള്‍ക്കുമ്പോഴുള്ള അതേ കഴപ്പ്.

    മറുപടിഇല്ലാതാക്കൂ
  14. അമ്മ...
    മലയാളത്തിലെ ഏറ്റവും മധുരമുള്ള വാക്ക്..!

    മറുപടിഇല്ലാതാക്കൂ
  15. സനാതനാ , മനോഹരമായിരിക്കുന്നു .

    മറുപടിഇല്ലാതാക്കൂ