19/3/08

പുഴകുളി

ഇരുട്ടുള്ള രാത്രിയില്‍
പുഴയില്‍ കുളിക്കുന്നത്‌
ശീലമായിരുന്നു.
ഇരുട്ടു കനത്താല്‍
ഈരിഴയന്‍ തോര്‍ത്തും ചുറ്റി
പുഴയിലേക്ക്‌ നടക്കും.

പുഴയിലേക്കുള്ള വഴിയില്‍
പകലുപോലെ ചില
പട്ടിണികള്‍
കക്കാനിറങ്ങുന്നുണ്ടാവും
പലവുരു പാടിയിട്ടും
തീരാത്ത പ്രണയം
ചില കാമുകന്മാര്‍
പതിയെപ്പാടുന്നുണ്ടാവും
കൂമനും കാട്ടുകോഴിയുമത്‌
മൂളിമുഴുമിപ്പിക്കുന്നുണ്ടാവും.
മിന്നാമ്മിന്നികള്‍ക്കൊപ്പം
ബീഡിവെളിച്ചങ്ങളും
പാറിനടക്കുന്നുണ്ടാവും
മുഖം കാണാത്ത പുഞ്ചിരികള്‍
കുശലം ചോദിക്കുന്നുണ്ടാവും
പുഴയിലേക്കുള്ളവഴിയില്‍
വെട്ടത്തിന്റെ പാല്‍പ്പാടയുണ്ടാവും.

പുഴക്കരയിലെത്തിയാല്‍
ചെരുപ്പുമുതല്‍
അടിയുടുപ്പുവരെ
മുഷിഞ്ഞുനാറുന്ന നഗ്നതകള്‍
ഊരിവച്ച്‌ വെള്ളത്തിലോട്ട്‌
ബ്ലും എന്നുചാടും
തമിഴത്തിപ്പെണ്ണുങ്ങള്‍
ചേലചുറ്റുന്നപോലെ
പുഴയെ കരയോട്‌ കരപിടിച്ച്‌
കുടഞ്ഞ്‌ ഞൊറിഞ്ഞുടുക്കും
തണുപ്പിന്റെ വരാലുകള്‍
ഉരുമ്മി നീന്താന്‍ തുടങ്ങും

പുഴയുടുത്തും കൊണ്ട്‌
വെളുക്കുവോളം
ഇരുട്ടില്‍ത്തന്നെ
നിന്നാലെന്തെന്ന് തോന്നും
വരാലുകള്‍ കൊത്തിപ്പറിക്കുമ്പൊള്‍
കരകയറി നടക്കും.

ഒരുനാള്‍ അബദ്ധത്തില്‍
പുഴയെ ഉടുത്ത്
പെരുവഴിയേ നടന്നു
ഏതോ വേട്ടക്കാരന്റെ
വെളിച്ചത്തിനു മുന്നില്‍പെട്ടു
എന്തുകൊണ്ടോ അവനെന്നെ
കൊല്ലാതെ വിട്ടു.

അവന്റെ കയ്യില്‍
തോക്കും നോക്കും ഉണ്ടായിരുന്നു
എനിക്കോ നാക്കില്ലാത്തൊരു
വാക്കുമാത്രവും.

18 അഭിപ്രായങ്ങൾ:

  1. തമിഴത്തിപ്പെണ്ണുങ്ങള്‍
    ചേലചുറ്റുന്നപോലെ
    പുഴയെ കരയോട്‌ കരപിടിച്ച്‌
    കുടഞ്ഞ്‌ ഞൊറിഞ്ഞുടുക്കും


    നന്ന്. വളരെ നന്ന്.

    മറുപടിഇല്ലാതാക്കൂ
  2. അവന്റെ കയ്യില്‍
    തോക്കും നോക്കും ഉണ്ടായിരുന്നു
    എനിക്കോ നാക്കില്ലാത്തൊരു
    വാക്കുമാത്രവും.
    നിശബ്ദത ഒരു വാക്കാണെ....?
    അല്ലായിരിക്കും.

    എന്റെ ഇന്നും നാളെയും പോയി സനാ.....

    വരാം

    മറുപടിഇല്ലാതാക്കൂ
  3. ഒടുവിലെ നാക്കില്ലാത്ത വാക്ക്.
    ആത്മാവിലേയ്ക്കൊരു നോക്ക്.
    ഇഷ്ടമായി.

    മറുപടിഇല്ലാതാക്കൂ
  4. പുഴയെ ഉടുത്തു നടന്നപ്പോള്‍ വെളിച്ചത്തില്‍ അതു കണ്ടത് വേട്ടക്കാരനായിരിക്കില്ല. കാട്ടാളനായിരിക്കും. അവനറിയാം പുഴയെന്താണെന്നും കാടെന്താണെന്നും അതു ഞൊറിഞ്ഞുടുക്കുന്നതെങ്ങനെയാണെന്നും. അവനു മാത്രമേ അറിയൂ..

    മറുപടിഇല്ലാതാക്കൂ
  5. "ചില
    പട്ടിണികള്‍
    കക്കാനിറങ്ങുന്നുണ്ടാവും.."

    "എനിക്കോ നാക്കില്ലാത്തൊരു
    വാക്കുമാത്രവും.."

    ഇഷ്ടപ്പെട്ടു..

    മറുപടിഇല്ലാതാക്കൂ
  6. ഒരിരുണ്ട നാട്ടുവഴിയിലൂടെയങ്ങിനെ പോവുകയാണെന്നൊരു തോന്നല്‍!
    നന്ദി സനാതനന്‍.

    മറുപടിഇല്ലാതാക്കൂ
  7. സമൃദ്ധമായൊന്നു കുളിച്ചു:)

    മറുപടിഇല്ലാതാക്കൂ
  8. ഒരുനാള്‍ അബദ്ധത്തില്‍
    പുഴയെ ഉടുത്ത്
    പെരുവഴിയേ നടന്നു

    എത്ര പറയേണ്ടെന്ന് കരുതിയാലും ചില കാര്യങ്ങളങ്ങിനെയാണ്. നമുക്ക് പറയാതിരിക്കാനാവില്ല. നിങ്ങളേത് മൂഢസ്വര്‍ഗ്ഗത്തിലാണെന്ന് ചുറ്റുമുള്ളവര്‍ പരിഹസിച്ചേക്കാം. വേട്ടയാടപ്പെട്ടേക്കാം എങ്കിലും.

    കവിതയില്‍ പുഴ പ്രതിനിധീകരിക്കപ്പെടുന്നത് ഒരു പുഴയെ മാത്രമല്ലാതെ, പുഴകളും മലകളും കാടും കാട്ടുചോലയും കുളങ്ങളും തോടും പാടങ്ങളുമൊക്കെയുള്‍ക്കൊള്ളുന്ന ആവാസവ്യവസ്ഥയെതന്നെയാകുമ്പോള്‍ കവിതക്ക് കൂടുതല്‍ അര്‍ത്ഥങ്ങള്‍ കൈവരുന്നു. ഇരുട്ടുള്ള രാത്രിയിലെ കുളി കവിയുടെ അടക്കിവെച്ച പ്രകൃതിപക്ഷചിന്തകളായിരിക്കണം. ഒരു നാള്‍ അത് പുറത്തുവരിക തന്നെ ചെയ്യും. കവിയുടെ ആയുധം വാക്കുകളാണല്ലോ.വേട്ടക്കാരന്റെ തോക്കിനേയും നാക്കിനെയും തന്റെ അക്ഷരങ്ങള്‍കൊണ്ട് അതിജീവിക്കാന്‍ കഴിയുമോ എന്ന ആശങ്ക നിലനില്‍ക്കെ തന്നെ തോക്കും നോക്കുമുള്ള വേട്ടക്കാരനുമുന്നില്‍ നാക്കില്ലാത്ത വാക്കായി തന്റെ കവിത പ്രത്യക്ഷമാകുക തന്നെ ചെയ്യുമെന്ന കവിയുടെ പ്രതീക്ഷ നാം ഓരോരുത്തരുടേതുമാണ്. പ്രകൃതിയെ സ്നേഹിക്കുന്ന നാം ഓരോരുത്തരുടേതും.

    ഈ ചിന്തകള്‍ക്കു മുന്നില്‍ പ്രതീക്ഷയോടെ, സ്നേഹത്തോടെ...
    സജി.

    മറുപടിഇല്ലാതാക്കൂ
  9. പരമ്പരാഗത രൂപഭാവങ്ങള്‍ അഴിച്ചുവച്ച് ‘പുഴയുടുത്ത’ എഴുത്തിനെ ആണ് സനല്‍ ഉദ്ദേശിച്ചതെങ്കിലോ‍ാ സജീ. പുഴയുട്ടുത്തുവരുമ്പോള്‍ നോക്കും തോക്കുമായി പലരെയും ഞാന്‍ കണ്ടിട്ടുണ്ട്.

    കവിയുടെ സര്‍വൈവല്‍ ഇന്‍സ്റ്റിംക്റ്റുമായി കമ്പെയര്‍ ചെയ്യുമ്പോള്‍ പ്രകൃതിസ്നേഹം ഒരു ലക്ഷ്വറിയാണ്!

    മറുപടിഇല്ലാതാക്കൂ
  10. കവിയുടെ സര്‍വൈവല്‍ ഇന്‍സ്റ്റിന്‍‌ക്റ്റ് എന്നത് കവിതയുടെ എന്നാക്കി വായിക്കുന്നതാണ് ശരി. അതാണുദ്ദേശിച്ചത്.

    മറുപടിഇല്ലാതാക്കൂ
  11. ഒരു വായനകൂടി കിട്ടിയെന്നേ എനിക്കു തോന്നുന്നുള്ളൂ.

    എന്തുകൊണ്ടോ അവനെന്നെ
    കൊല്ലാതെ വിട്ടു.
    അവന്റെ കയ്യില്‍
    തോക്കും നോക്കും ഉണ്ടായിരുന്നു
    എനിക്കോ നാക്കില്ലാത്തൊരു
    വാക്കുമാത്രവും.

    കവിതയുടെയല്ല താന്‍ ഉള്‍ക്കൊള്ളുന്ന സമൂഹത്തിന്റെ തന്നെ നിലനില്പിനുള്ള ത്വര എന്ന് വിശാലമായ അര്‍ത്ഥം. ::)

    മറുപടിഇല്ലാതാക്കൂ
  12. നീന്താനറിയില്ലെനിക്ക്.
    അതറിഞ്ഞിട്ടും ചില പുഴകള്‍ ചിലപ്പോള്‍ ഒരു മുങ്ങാങ്കുഴിയ്ക്ക് ക്ഷണിക്കും.
    ചില പ്രണയങ്ങള്‍ അങ്ങനെയായിരിക്കും,അല്ലേ...

    ഈ പുഴയിലെ കുളി ആസ്വദിച്ചു.നന്ദി.

    മറുപടിഇല്ലാതാക്കൂ
  13. Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the OLED, I hope you enjoy. The address is http://oled-brasil.blogspot.com. A hug.

    മറുപടിഇല്ലാതാക്കൂ
  14. അവന്റെ കയ്യില്‍
    തോക്കും നോക്കും ഉണ്ടായിരുന്നു
    എനിക്കോ നാക്കില്ലാത്തൊരു
    വാക്കുമാത്രവും.
    ഞാനെന്തു പറയാനാ സനാതനാ വീണ്ടും വീണ്ടും വായിക്കുക മാത്രം ചെയ്യുന്നു

    മറുപടിഇല്ലാതാക്കൂ
  15. ചേലചുറ്റുന്നപോലെ
    പുഴയെ കരയോട്‌ കരപിടിച്ച്‌
    കുടഞ്ഞ്‌ ഞൊറിഞ്ഞുടുക്കും

    കവിതയിവിടെ നിന്നും കാല്‍പ്പനികതയില്‍ മുങ്ങിക്കുളിച്ച് പടവുകള്‍ കയറി യാഥാര്‍ത്ഥ്യത്തിലേക്ക് ട്രാന്‍സ്ഫോം ചെയ്യുന്നതു കൌതുകത്തോടെ കണ്ട് കണ്ട് ഞാനങ്ങിരിക്കാന്‍ തുടങ്ങിയിട്ട് നാള്‍ കുറെ ആയി.

    അവന്റെ കയ്യില്‍
    തോക്കും നോക്കും ഉണ്ടായിരുന്നു
    എനിക്കോ നാക്കില്ലാത്തൊരു
    വാക്കുമാത്രവും.

    ഓഫ്: മാഷ് തല്ലി ഓടിച്ചതല്ല; സ്വയംശിക്ഷാ കാലയളവാണ്.:) കവിതയിങ്ങിനി മരിച്ചുവോ എന്ന് തോന്നുമാറ് നാക്കില്ലാത്തൊരു വാക്കു മാത്രമായി ഞാനിരിക്കുന്നു. ഇനി ശരിക്ക് കവിത പാകമായിട്ടേ എഴുതുന്നുള്ളൂ എന്ന് കരുതുന്നു. ഇതിനിടയില്‍ ഒരു കഥയെഴുതാനും പ്ലാന്‍ ഉണ്ട്. ഒരല്‍പ്പം ഫാന്‌റസി ഇട കലര്‍ത്തി ഒരു കഥ.

    മറുപടിഇല്ലാതാക്കൂ